Read Tshiluba Misambu 80 Bible Online

Misambu 80 - Tshiluba bible

Misambu 80

¹Musambu wa mu mukanda wa mulombodi wa bena misambu, wa mu mukanda wa misambu ya Asafe,[379] wa kuimba ne lunzenze.

²Eyi, mulami wa mikoku wa bena Izrayele, teleja! Wewe udi ulombola bantu bebe bu mudi muena mikoku, wewe udi ne nkuasa wa bumfumu pa mutu pa bakerubine.[380]

³Uleje bukole buebe, ku mesu a bisamba ebi: tshia Efrayime, tshia Binyamine, ne tshia Menashe utuakidile, utupandishe.

⁴Mvidi Mukulu, utulongeshe, utupingaje kuudi, nanku netupande.

⁵Maweja-Nangila, Mvidi Mukulu wa bukole buonsu, tshiji tshiebe netshijike diba kaayi? Bilondeshile mudi bantu bebe bakutendelela?

⁶Udi mukutshishe bantu bebe ne kanyinganyinga, kukuatshikabu binsonji makopu tente.

⁷Udi mutukebeshe matandu kudi bena mutumba, baluishi betu badi batulembakaja.[381]

⁸Mvidi Mukulu wa bukole buonsu, utupingaje kuudi, utuakidile netupande.

⁹Wewe kutula mutshi wa mvinyo[382] mu Ejipitu, wewe kuipata bisamba bia bantu bua kuukuna tshiakabidi.

¹⁰Wewe kulongoluela muaba wawu. Pashishe kuelawu miji, kutangalakawu mu ditunga,[383]

¹¹dileji diawu kubuikila mikuna, matamba awu kubandawu pa mitshi ya sedre.

¹²Kulepeshawu matamba awu too ne ku mayi manene, ntonga yawu kufika too ne ku musulu wa mayi a Perate.[384]

¹³Udi mutule lupangu luawu bua tshinyi? Bonsu badi bapita mu njila badi baupopola, bapola tumuma tuawu,

¹⁴ngulube wa ditu udi uunyanga, nyama ya tshisuku idi iudia.

¹⁵Mvidi Mukulu wa bukole buonsu, pingana, mu diulu muudi amu, utangile panshi umone bidi bituenzekela, akuila mutshi wa mvinyo ewu.

¹⁶Ukube[385] mutshi uuvua wewe nkayebe mukune, — ne muana ewu wa balume uudi mukoleshe. —

¹⁷Bantu bavua bosha mutshi ewu mu kapia[386] nebauvingutule, miaku yebe ibatape, bafue babutuke!

¹⁸Tshianza tshiebe tshishale pa mutu pa mukalenga, udi usomba ku tshianza tshiebe tshia balume,[387] pa mutu pa muntu ewu uuvua mukoleshe.

¹⁹Nenku, katuena tumuka kuudi to, utulame ne muoyi, netukutendelele amu wewe.

²⁰Maweja-Nangila, Mvidi Mukulu wa bukole buonsu, utupingaje kuudi, utuakidile netupande.