Read Tshiluba Misambu 83 Bible Online

Misambu 83 - Tshiluba bible

Misambu 83

¹Musambu wa mu mukanda wa misambu ya Asafe[399].

²Mvidi Mukulu, kuikishi, kupuwi to, kusombi tshianana kuyi ne tshiudi wenza.

³Mona baluishi bebe badi benza disalu, badi bakukina badi bakulundukila, bela mitu mulu.

⁴Badi belela bantu bebe tshitungu, badi belela bantu bebe baudi ulama tshipangu.

⁵Badi bambilangana ne: “Tuyayi, tubabutule, bua kabikadi ne tshisamba tshia bantu, bua kabatedi kabidi dina dia bena Izrayele tshiendelele!”

⁶Badi bakonkangana meji, bumvuangana bonsu, bua kutua ndondu wa kukuenzela bibi.

⁷Bantu abu, mbena Edome[400] ne bena Ishemayele, bena Mowabe, ne Agare ne bena Ngebale,

⁸bena Amone ne bena Amaleke, bena Peleshete ne kabidi bena ditunga dia Tire.

⁹Too ne bena Ashure mbadisangishe nabu, bua kuambuluisha ndelanganyi ya Lote.[401]

¹⁰Eyi, Mvidi Mukulu, enzela bantu aba bu muuvua muenzele Sisra ne Yabine, ku musulu wa muenji mukole wa Kishone. Nansha bu muuvua muenzele bena Madiyane,

¹¹bavua babashipe ku mpokolu wa Arode.[402] Kushalabu bufuke bua buloba.

¹²Wenzele bana ba bamfumu babu, bu Orebe ne Zebe, ne bamfumu babu bonsu bu Zeba ne Salmuna,

¹³bantu aba bavua bamba ne: “Tunyenge muaba wa Mvidi Mukulu, ushale wetu.”

¹⁴Mvidi Mukulu wanyi, ubenze bashale bu ntete ya mitshi, mipepula kudi lupepela.

¹⁵Bu mudi kapia kuosha ditu, bu mudi ludimi lua kapia lutemesha kapia ka mikuna minene,

¹⁶ubipate ne mvula wa tshipupu, ubatshinyishe ne mvunde.

¹⁷Ubafuishe bundu mesu tente, bua batangile kuudi wewe Maweja-Nangila.

¹⁸Bundu ne bowa bibakuate tshiendelele, ditekemena diabu dijimine, bafue menemene.

¹⁹Nenku bamanye ne: Wewe udi Maweja-Nangila, udi nkayebe pa buloba bujima, Mvidi Mukulu Muena Kulu.