Read Tshiluba Misambu 86 Bible Online

Misambu 86 - Tshiluba bible

Misambu 86

¹Ditendelela dia mu mukanda wa misambu ya Davide. Maweja-Nangila, teya ditshi diebe kundi, ungitabe, bualu ndi mupele ne muena dikenga.

²Ndi umue wa ku bantu bebe badi bakulamate, undame. Ndi muena mudimu webe, ndi ntekemena kuudi, unsungidile wewe Mvidi Mukulu wanyi.

³Maweja-Nangila, ndi nkubikila matuku anyi onsu, ungambuluishe.

⁴Maweja-Nangila ndi ntangila kuudi wewe, ndi nkusengelela, unsankishe.

⁵Maweja-Nangila wewe udi muakane, udi ne muoyi wa kufuila bantu luse, ne wa kupesha badi bakubikila bintu.

⁶Maweja-Nangila, teleja mundi nkutendelela, umvue pandi nkutendakena.

⁷Pandi mu dikenga, ndi nkubikila bualu neungitabe.

⁸Maweja-Nangila, kakuena mvidie umue udi bu wewe, kakuena mvidie udi mua kuenza biudi wewe wenza.

⁹Wakafuka bisamba bionsu, nebifike bua kukukukuila, ne kukutumbisha wewe Maweja-Nangila.[411]

¹⁰Bualu udi munene, udi wenza malu a dikema, udi amu wewe nkayebe, Mvidi Mukulu mulelela.

¹¹Maweja-Nangila, undeje njila undi mua kulonda, ndi musue kuenda mukulamate, nsumpakana amu bua bualu bumue: kukutumikila wewe.

¹²Maweja-Nangila, Mvidi Mukulu wanyi, nenkutumbishe ne muoyi wanyi onsu, nenkunemeke matuku onsu.

¹³Buimpe buebe buudi mundeje budi bunene, udi mumpatule mu dijimba dia lufu.

¹⁴Eyi, Mvidi Mukulu, bena kapeja badi bajuka bua kunduisha, tshisumbu tshia bantu bapange malu tshidi tshikeba kunshipa. Kabena bakuangata ne mushinga to.

¹⁵Kadi wewe, Maweja-Nangila, Mvidi Mukulu udi ufuila bantu luse, wa lutulu, muwule tente ne buimpe, ulama malaya ebe,[412]

¹⁶tangila kundi, ungambuluishe. Ndi muena mudimu webe, umpeshe bukole buebe, ndi muntu webe, unsungidile.

¹⁷Umpeshe tshimanyinu tshidi tshindeja ne: malu onsu neende bimpe. Bundu bukuate badi bankina, pamonabu ne wewe, Maweja-Nangila udi munsungidile ne munsambe!