Read Tshiluba Misambu 9 Bible Online

Misambu 9 - Tshiluba bible

Misambu 9

¹Musambu wa mu mukanda wa mulombodi wa bena misambu, wa kuimba ne meyi matue.[33] Musambu wa mu mukanda wa misambu ya Davide.

²Maweja-Nangila, ndi nkutumbisha ne muoyi wanyi mujima,[34] mmanyisha bantu bonsu bia dikema biudi muenze.

³Ndi nsanka, nsanguluka bualu buebe, ngimbila dina diebe wewe, Mvidi Mukulu Muena kulu.

⁴Paudi umueneka, baluishi banyi badi banyema, badishinda, bafue.

⁵Paudi usomba mu nkuasa webe, udi ulumbuluisha tshilumbu amu pa tshiotshi. Ke muudi mukose nsambu yanyi, mumbingishe.

⁶Udi utandisha bisamba bidi bikubenga, ubutula bantu badi kabayi bakulamate, ukupula mena abu kashidi tshiendelela.

⁷Baluishi betu mbabutuke, butubutuu. Wewe udi munyange bimenga biabu, bishale munda mutupu. Dina diabi mene ndijimine.

⁸Maweja-Nangila udi ne bumfumu bua kashidi.[35] Udi musombe mu nkuasa bua kulumbuluisha bantu.

⁹Yeye ke udi ulombola bantu kayi ne kansungansunga, ukosa nsambu ya bukua bisamba pa yoyi.

¹⁰Kudi Maweja-Nangila ke kudi bonsu badibu bakengesha banyemena, ke kudibu basokomena diba dia dikenga.

¹¹Maweja-Nangila, bantu badi bamanye muudi, badi bakutekemena, bualu kuena ulekela badi bafika kuudi.

¹²Tumbishayi Maweja-Nangila ne misambu. Nkuasa wende udi pa mukuna wa Siyone. Numanyishe bukua bisamba bidiye muenze.

¹³Udi unyoka bashipianganyi, uvuluka bavuabu bakengesha. Kena upua muoyi bena dikenga badi bamubikila.

¹⁴Maweja-Nangila ungambuluishe, tangila mudi baluishi banyi bankengesha bikole. Ungumushe ku kandondu ka bafue.

¹⁵Nenku nemmanyishe bantu badi basangile mu Siyone, mundi nkutumbisha bua bionsu biuvua mungenzele. Nengele mbila ya disanka bualu uvua mumpandishe.

¹⁶Bisamba bia bantu mbidishinde mu tshiina, tshivuabi biumbuile bisamba bikuabu. Bukondu buvuabi biele mu musokoku[36] mbubijingile.

¹⁷Maweja-Nangila mmudileje mudiye, mmukose nsambu pa yoyi. Muntu mubi mmudikuatshishe mu bukondu buvuaye muele.

¹⁸Bantu babi bonsu badi bapua Mvidi Mukulu muoyi, bapingane mu kandondu ka bafue.

¹⁹Kadi Mvidi Mukulu kakupua bena dikenga muoyi kashidi. Ditekemena dia bapele kadiena mua kujimina tshiendelele.

²⁰Maweja-Nangila juka, muntu kalupitshi bukole! Bikila bisamba bidi bikubenga, ubilumbuluishe.

²¹Maweja-Nangila, ukuatshishe bantu ba bisamba bikuabu abi buowa, bamanye ne: badi amu bantu.