Read Tshiluba Misambu 91 Bible Online

Misambu 91 - Tshiluba bible

Misambu 91

¹Muntu udi usokomena kudi Mvidi Mukulu Muena kulu, ubutamine kudi Wa kukole buonsu.

²Muntu awu neambile Mvidi Mukulu[440] ne: “Wewe udi musoku mukolesha undi nsokomena, wewe ke Mvidi Mukulu wanyi, undi ngeyemena.”

³— Maweja-Nangila ke udi ukusungidila, ku mateyi adibu bakuteya, ne ku tshipupu tshia lufu.

⁴Neakulame, neusangane tshisokomenu kudiye, bu muana wa nzolu, usokoma mu mapuapua a mamuende. Bulelela buende budi bu ngabu udi ukulama.

⁵Kuena mua kutshina tshintu nansha tshimue, nansha njiwu idi ikuatshisha bantu bowa butuku, nansha muketa udibu bela mu munya,

⁶nansha tshipupu tshidi tshiendakana mu midima, nansha disama dia tshiambu didi dikuata bantu munda munya.[441]

⁷Bulelela nansha bipupu ebi bishipa bantu tshinunu pa buipi nebe, nansha bishipa binunu dikumi ku dia balume diebe, bualu nansha bumue kabuena bukuenzekela.

⁸Tabala tshianana, neumone mudi Mvidi Mukulu ufuta bantu babi!

⁹Bulelela, Maweja-Nangila, udi tshisokomenu tshiebe, wewe udi musungule Muena kulu bu tshisokomenu tshiebe.[442]

¹⁰Bualu bubi nansha bumue kabuena bukukuata, dikenga nansha dimue kadiena disemena pabuipi nebe.

¹¹Bualu Maweja-Nangila neatumine batumibue bende diyi, bua bakulame kuonsu kuudi uya.

¹²Nebakuambule mu bianza biabu, bua kukumi dikasa diebe ku dibue.[443]

¹³Neudiate nyama wa ntambue, ne nyoka wa ntoka kabiyi bikuenzela bualu, neutue nyama wa muitu ne nyoka miseba.[444]

¹⁴Maweja-Nangila udi wamba ne: “Bu mudiye mundamate, nemmusokoke, nemmulame, bualu mmumanye tshindi.

¹⁵Pambikilaye bua kumuambuluisha, nemmuambuluishe, mu dikenga nengikale pabuipi nende, nemmusungidile, nemmutumbishe.

¹⁶Nemmupeshe disanka, neashale ne muoyi bidimu bia bungi, nemmuleje ne: ndi musungidi wende.”