Read Tshiluba Misambu 92 Bible Online

Misambu 92 - Tshiluba bible

Misambu 92

¹Musambu wa dituku dia Dikisha.

²Maweja-Nangila bidi bimpe kukutumbisha, kukuimbila misambu wewe Mvidi Mukulu Muena kulu,

³kumanyisha bantu malu ebe mimpe mu dinda, ne kubamanyisha bulelela buebe butuku,

⁴kubamanyisha ne lunzenze ne lunkombe[445] ne biombelu bionsu!

⁵Maweja-Nangila, malu audi muenze, adi manguwule munda tente ne disanka, ndi nganyisha biudi muenze.

⁶Maweja-Nangila malu audi muenze adi manene, meji ebe adi male.

⁷Muntu udi kayi ne meji, kena mumanye, mutshimbakane kena ujingulula tshintu.

⁸Bantu babi badi batumpuka bu bisosa, bantu badi benza bibi bonsu badi batanta, kadi kabutu ka kashidi nkabindile.

⁹Kadi wewe Maweja-Nangila, udi ukokesha matuku onsu.

¹⁰Bua baluishi bebe, Maweja-Nangila, bobu nebajimine, ne bonsu badi bakengesha bakuabu, nebatangalake.

¹¹Udi mumpeshe bukole bu bua nyama wa mbowa, udi mungele[446] mafuta mapiamapia pa mutu.

¹²Ndi mumone mudibu batshimuna bena lukuna banyi,[447] ndi mumvue muadi wa badi banduisha.

¹³Kadi muntu muakane udi ukola, bu dibue dia ngaji, udi ulepa bu mutshi wa sedre wa mu Lebanone.

¹⁴Udi bu mutshi mukuna mu lubanza lua nzubu wa Mvidi Mukulu, udi udiunda mu nzubu mua Maweja-Nangila Mvidi Mukulu wetu.

¹⁵Neukuame bimuma too ne pakulakajawu, newikale ne mayi, neushale mubishi,

¹⁶bua kujadikila bantu ne: Maweja-Nangila udi muakane. Udi ne muoyi umue, yeye ke Dibue dianyi.