Read Tshiluba Misambu 96 Bible Online

Misambu 96 - Tshiluba bible

Misambu 96

¹Imbilayi Maweja-Nangila, musambu mupiamupia, nuenu bantu ba pa buloba bujima, imbilayi Maweja-Nangila musambu.

²Imbilayi Maweja-Nangila musambu, numusakidile bualu udi Mvidi Mukulu wenu. Numanyishe bantu ku dituku ne ku dituku ne: Mvidi Mukulu udi Musungidi.

³Nuambile bantu bonsu butumbi buende, numanyishe bukua bisamba malu a kukema adiye muenze.

⁴Maweja-Nangila udi munene, bidi bimpe bamutumbishe. Bamutshine kumpala kua mvidie yonsu.

⁵Mvidie ya bisamba bikuabu bionsu idi patupu, Maweja-Nangila ngudi mufuke diulu.

⁶Udi ukenkesha bunene ne buneme, nzubu wende udi ne bukole ne bukenke bua bungi.

⁷Nuenu bantu ba matunga onsu, luayi nunemekele Maweja-Nangila, numanyishe butumbi ne bukole buende.

⁸Luayi numanyishe butumbi buende, buelayi mu lubanza lua nzubu wende, numutuadile milambu.

⁹Nuenu bantu ba pa buloba bujima, kukuilayi Maweja-Nangila, bavuala bilamba bia tshijila,[457] padiye uleja bunema buende bua tshijila, nuzakale kumpala kuende.

¹⁰Nuambile bantu bonsu ne: “Maweja-Nangila udi mukalenga, buloba budi bushindame kabuena bunyunga, Maweja-Nangila udi ukosa nsambu ya bantu amu pa yoyi.”

¹¹Diulu disanka, buloba busanguluke, mayi manene ne bionsu bidimu bikungule.

¹²Mpata ne bionsu bidimu bisanke, mitshi yonsu ya muitu yela mbila ya disanka,

¹³kumpala kua Maweja-Nangila, bualu udi ufika, udi ufika bua kulumbuluisha bantu ba pa buloba. Udi mukoshi mulelela wa bilumbu bia bantu.