Read Tshiluba Nsumuinu 10 Bible Online

Nsumuinu 10 - Tshiluba bible

Nsumuinu 10

¹Nsumuinu ya Shelomu. Muana wa balume wa meji, udi usankisha baledi bende; kadi muana mupote, udi ubungamija bena kuabu.

²Biuma bipeta ku bubi kabiena bilubuluka kudi udi nabi, kadi muntu udi uvuluka Mvidi Mukulu mu midimu yende neashale ne muoyi.

³Maweja-Nangila kena musue bua muntu udi umulamata afue nzala, kadi kena musue bua muntu mubi apete tshidiye ujinga.

⁴Bianza bia muena lulengu bidi bibueja muntu mu bupele, kadi bianza bia mukuatshi wa mudimu bidi bipetesha lupetu.

⁵Muena meji udi usangisha biakudia tshikondu tshia mvula, kadi muntu udi ulala tshikondu tshia dinowa mbimpe bantu bamupepeje.

⁶Bantu badi bavuluka Mvidi Mukulu, badi badikebela diakalenga, kadi mukana mua bantu babi mudi mvita.

⁷Muntu udi unemeka Mvidi Mukulu badi bamuvuluka ne disanka, kadi nansha dina mene dia bantu babi badi badipua muoyi.

⁸Muntu wa meji udi wanyisha mibelu. Muntu muena biakulakula neabutuke lukasa.

⁹Kusomba biakane nkusomba talalaa. Muntu mubi neatunduke.

¹⁰Udi kayi musue kuambila bantu malu patoke mudiwu, udi ubakengesha; kadi udi ubabela bimpe, udi usombesha bantu mu ditalala.[34]

¹¹Miaku ya muntu muakane idi mpokolu wa muoyi.[35] Miaku ya muntu mubi idi ijuula mvita.

¹²Lukinu ludi lujuula matandu, kadi dinanga didi dijibikila bilema.[36]

¹³Muena meji badi bamumanyina ku miaku ya lungenyi idiye wakula, kadi udi kayi wela meji badi bamutuuta!

¹⁴Bantu ba meji badi bakolesha misangu yonsu lungenyi luabu. Kadi miaku ya bapote neibafikishe lukasa ku kabutu.

¹⁵Biuma bia mubanji bidi bimulama bu mudi tshimana tshikole tshilama nzubu. Kadi dikenga didi dibutula mupele.

¹⁶Mudimu wa muntu muakane udi umupetesha muoyi. Kadi difutu dia muntu mubi didi dimufikisha ku bubi.

¹⁷Muntu udi uvuluka malongesha udi wenda mu njila wa muoyi. Udi ubenga mibelu udi upambuka.

¹⁸Muntu udi utekelangana lukinu mu musokoku, udi muena lubombu. Yonsu udi utumpilangana malu ku mesu a bantu, mmuntu mutshimbakane.

¹⁹Muntu udi wakula malu mavule, udi utupakana bikole. Kadi muntu wa meji udi mumanye mua kulama ludimi luende.

²⁰Miaku ya muntu udi utshina Mvidi Mukulu mmipite tshiamu tshitoke tshia mushinga mukole. Tshidi muntu mubi wela meji katshiena ne mushinga to.

²¹Miaku ya muntu muakane idi iludika bantu ba bungi. Kadi bapote badi bafue bua dibenga kuela meji.

²²Kabiena kuluila. Maweja-Nangila nkayende ngubipapa bantu.

²³Bubi budibu benza budi busankisha muntu mutatakane. Meji adi muena lungenyi upeta adi amusankisha.

²⁴Tshidi bantu babi batshina tshidi tshibatulukila. Tshidi bantu bakane bajinga badi batshipeta.

²⁵Bantu babi badi bafue mu tshikondu tshia tshipupu, kadi bakane badi batshikolela kashidi.

²⁶Maluvu a buanji adi afila buanji ku menu, muinshi udi ukunjija mesu. Ke mudi muena lulengu ufikisha mfumuende munda.

²⁷Badi batshina Maweja-Nangila badi balala matuku mavule pa buloba, kadi benji ba malu mabi badi badianza kufua lukasa.[37]

²⁸Tshidi bantu bakane mua kutekemena ke disanka, bantu babi kabena mua kutekemena tshintu nansha tshimue.

²⁹Maweja-Nangila udi tshieyemenu tshia bantu bakane, kadi udi ubutula badi benza bibi.

³⁰Muntu udi ulamata Mvidi Mukulu udi ushindama kashidi. Kadi babi kabakusomba mutantshi mu ditunga to.

³¹Mukana mua muntu muakane mudi mupatuka meji. Kadi ludimi lua muena dishima mbimpe balukose.

³²Miaku ya muntu muakane idi ilengelela bantu, kadi miaku ya muena lonji idi ibabungamija.