Read Tshiluba Nsumuinu 11 Bible Online

Nsumuinu 11 - Tshiluba bible

Nsumuinu 11

¹Maweja-Nangila udi udiwula bantu badi ne bitempelu bia dishima, kadi udi wanyisha badi bapima bintu mudibi.[38]

²Muntu udi uditambisha nebamupetule, kadi muntu wa meji udi udipuekesha.

³Muntu wa malu mempe badi bamulombola kudi muoyi wende muakane. Kadi muntu mubi, malu ende mabi adiye munange adi amubutula.

⁴Biuma kabiena bituambuluisha dituku didi Mvidi Mukulu ukosa nsambu. Amu udi ulamata Mvidi Mukulu ke udi upanduka ku lufu.

⁵Buakane bua muntu udi ukeba Maweja-Nangila budi buludika nsombelu wende. Kadi muntu mubi udi ujimina bua bubi buende.

⁶Buakane bua mulamatshi wa Mvidi Mukulu budi bumujikila njiwu. Kadi lukuka lua badi badingangana ludi lubafila ku kabutu.

⁷Padi muntu mubi ufua, biwaye utekemena bidi bifua kabidi, nangananga biwaye utekemena kupeta ku biuma biende.

⁸Muntu muakane udi upanduka ku dipampakana. Muntu mubi udi ubuelamu pa mutu pende.

⁹Muntu udi uvila Mvidi Mukulu, udi ubutula bakuabu ne miaku yende. Kadi muntu udi ulamata Mvidi Mukulu, udi upandisha bakuabu ne meji ende.

¹⁰Bena ditunga badi basanka padi bantu bakane bapeta diakalenga. Kadi badi bela mbila basanka padi bantu babi bafua.

¹¹Bantu bakane badi basa tshimenga batshiela lupemba. Miaku mibi ya bena lonji idi itshibutula.

¹²Udi upepeja mukuende, mmubule meji. Muntu wa lungenyi udi upuwa.

¹³Muena bijanu udi wela malu masokome patoke. Muntu mujalame udi ulama malu awu munda muende.

¹⁴Tshisamba tshidi tshijimina paditshi katshiyi ne batshiludiki. Bualu lupandu ludi mukana mua bafidi ba ngenyi.

¹⁵Muntu udi udieyeka bua kufuta mabanza a bakuabu udi udienzela bibi. Udi utshina kuenza nanku udi wepuka ku njiwu.

¹⁶Mukaji mulenga udi upeta lumu. Muntu wa bukitu udi upeta bubanji.

¹⁷Muena luse udi wenzela muoyi wende bimpe. Kadi muena tshikisu udi udienzela bibi nkayende.

¹⁸Difutu didi muntu mubi wangata didi dimudinga. Kadi udi wenza bidi Mvidi Mukulu musue kakupanga difutu diende.

¹⁹Udi mushindame bua kuenza bidi Mvidi Mukulu musue, neapete muoyi. Kadi udi musungule bubi neafuilemu.

²⁰Maweja-Nangila udi upetula bantu bena budimu. Kadi udi wanyisha bantu ba muoyi umue.

²¹Bushuwa, bantu babi nebabanyoke. Kadi bantu bakane bonsu nebashale amu katakata.

²²Mukaji mulengele kuisu kadi kayi ne lungenyi munda, udi bu kakanu ka mpawungi, kadibu bela ku diulu dia ngulube.

²³Bantu bakane badi bajinga kuenza bimpe. Bantu babi badi bakeba amu tshiji tshia Mvidi Mukulu.[39]

²⁴Badi bapeshangana bintu ne muoyi muimpe, badi bavudija biuma biabu. Kadi badi balamina biabu ne bukonkotu, biabu abi bidi bikepela.

²⁵Muntu udi wenzelangana bimpe, neapete diakalenga. Udi upa mukuabu tshiakunua, kakufua nyota.

²⁶Bantu badi batshipa badi bakandamana ne biakudia amu buabu nkayabu.[40] Kadi badi banyisha bantu badi babapanyishabi.

²⁷Mvidi Mukulu udi wanyisha muntu udi wenza bimpe. Kadi diakabi didi dikuata udi wenza malu mabi.

²⁸Udi utekemena kudi biuma biende neajimine bu mudi mabeji a mutshi amata panshi. Kadi bantu bimpe nebasampile bu tshifufu tshia mutshi utshidi ne mabeji mabishi.

²⁹Muntu udi ushiya nzubu wende tshintshiompatshiompa, lupepele neluambule bintu biende. Muntu mutatakane neashale mupika wa muena meji.

³⁰Bidi muntu udi utshina Mvidi Mukulu wenza, bidi bipetesha muoyi. Muntu wa meji udi usankisha bakuabu.

³¹Muntu muakane neapete difutu diende pa buloba. Kadi mimanye ne: muena lonji ne muenji wa bibi, nebapete difutu dibakumbanyine.[41]