Read Tshiluba Nsumuinu 12 Bible Online

Nsumuinu 12 - Tshiluba bible

Nsumuinu 12

¹Muntu udi musue kulonga malu, udi unanga badi bamubela. Kadi udi ubenga mibelu udi tshibubabuba.

²Maweja-Nangila udi wanyisha muntu muimpe, kadi udi udiwula muntu udi upangadika bibi.

³Muntu kena ushindama padiye wenza malu mabi. Kadi tshintu nansha tshimue katshiena tshishindisha bakane.

⁴Mukaji wa bukitu udi ukebela bayende lumu. Mukaji mubi udi bu disama didi didia mifuba ya bayende.

⁵Bantu badi bavuluka Mvidi Mukulu, badi belangana meji matuku onsu a kuenzelangana biakane. Kadi bantu babi kabena bela meji makuabu, amu a kudingangana.

⁶Miaku ya bantu babi idi mateyi adi akebela bantu lufu. Tshidi bantu bakane bamba, tshidi tshiepula bakuabu ku lufu.

⁷Padibu babutula bantu babi, biabu bionsu mbijimine. Kadi diku dia bakane nedishale kashidi.

⁸Badi batumbisha muntu wa meji. Kadi badi badiwula muntu mububakane.

⁹Bidi bimpe kuikala muntu udi kayi ne bintu bia bungi, kadi muikale ne muena mudimu, pa mutu pa kuditambisha kumpala kua bantu kuyi ne biakudia.

¹⁰Muntu muakane mmumanye nansha tshidi bimuna biende bikengela. Muntu mubi udi nabi ne tshikisu.

¹¹Muntu udi udima budimi buende neikale ne biakudia bia bungi. Kadi muntu udi udidinga udi upanga malu.

¹²Muena malu mabi udi ujinga kupeta makasa amu ku bubi. Kadi bantu bakane badi bapeta makasa a mushinga a ku disuminyina diabu.[42]

¹³Muntu mubi badi bamukuata mu buteyi amu ku miaku yende ya dishima. Kadi muntu muakane udi upanduka ku dikenga dionsu.

¹⁴Miaku ya muntu idi mua kumupetesha diakalenga, bu mudi mudimu upetesha muntu difutu.

¹⁵Muntu mutatakane udi udimona misangu yonsu ne: ndi ngenza bilenga. Kadi muntu wa lungenyi udi wanyisha mibelu.

¹⁶Muntu mutshimbakane udi uleja tshiji tshiende patoke diakamue. Kadi muntu wa lungenyi udi usokoka kanyinganyinga kadiye naku.

¹⁷Muntu udi wamba malu malelela patoke, udi wambuluisha bantu. Kadi udi ujadika malu a dishima, udi wambuluisha badi badinga bantu.

¹⁸Muena biakulakula udi utapa mputa minene bu ya muele wa mvita. Kadi ludimi lua bantu ba meji ludi bondapa.

¹⁹Malu malelela neashale kashidi. Kadi miaku ya dishima neishale katupa kipi.

²⁰Bantu badi bela meji a kuenza bibi, badi badidinga nkayabu. Kadi bantu badi babela bantu bua basombe bimpe, nebapete disanka.

²¹Muntu muakane kena umona dikenga. Kadi babi badi munkatshi mua makenga.

²²Maweja-Nangila udi udiwula bena dishima. Kadi udi wanyisha badi bamba malu pa wowu.

²³Muntu muena lungenyi kena uditambisha bua bidiye mumanye. Kadi batatakane badi baleja butatakane buabu patoke.

²⁴Mudimu udi upetesha muntu bumfumu. Kadi lulengu ludi lumufila ku bupika.

²⁵Ntatu idi itekesha muntu mu maboku. Muaku muimpe udi umukolesha ku muoyi.

²⁶Muntu muakane udi uludika mulunda wende mu njila mulenga. Bidi muntu mubi wenza bidi bipambula balunda bende.

²⁷Tshilembi wa lulengu kena mua kushipa nyama. Nanku mbilenga bua muntu ikale ne disuminyina divule.

²⁸Mu njila wa buakane mudi muoyi. Padi muntu ulonda njila ewu kena ufika ku lufu.[43]