Read Tshiluba Nsumuinu 13 Bible Online

Nsumuinu 13 - Tshiluba bible

Nsumuinu 13

¹Muana wa meji udi uteleja mibelu ya tatuende. Kadi udi uditambisha kena uteleja nansha umue.

²Muntu wa malu mempe udi upeta tshipeta tshimpe ku miaku idiye wamba. Kadi bantu ba malu mabi badi amu bakeba mvita.

³Muntu udi ukuba ludimi luende, udi ukuba muoyi wende. Kadi udi wakula kayi wela meji, udi udijimija.

⁴Muena lulengu udi ujinga tshintu kayi utshipeta. Kadi muntu wa tshisumi udi upeta tshidiye musue.

⁵Muntu muakane udi ubenga dishima. Muntu mubi udi upepeja bakuabu, ubajana.

⁶Muntu wa malu makane, buakane buende budi bumulama. Kadi bantu badi benza bibi, bubi buabu budi bubafila ku kabutu.

⁷Bamue bantu badi badiangata bu babanji, bobu bikale bianza bitupu. Banga kabidi badi badiangata bu bapele, bobu bikale babanji.

⁸Misangu mikuabu muena biuma udi ufuta makuta bua kudipandisha. Kadi mupele kena ne badi mua kumukanyina.

⁹Muakane neakenke bu butoke budi buela nsese. Kadi muntu mubi udi bu muendu udi ujima.

¹⁰Diditambisha didi dikeba matandu. Muntu udi uteleja mibelu udi ne meji.

¹¹Biuma bipeta mu tshipututuku bidi bijimina lukasa. Kadi bidibu bangule ku kakese ku kakese bidi bienda bivulangana.

¹²Kupanga kukumbajila muntu bualu, kudi kumutekesha ku muoyi. Dijinga didibu bakumbaja didi mpokolu wa muoyi.

¹³Muntu udi upetula meji adibu bamuambila neajimine. Kadi muntu udi unemeka mukandu, neapete difutu.

¹⁴Dilongesha dia muena meji didi mpokolu wa muoyi, didi diepula muntu ku njiwu ya lufu.[44]

¹⁵Muntu wa lungenyi udi udinemeshisha kudi bantu. Muntu mubi udi usomba mu dikenga.[45]

¹⁶Muntu mudimuke udi wela meji bangabanga ne kuenzaye bualu. Kadi batshimbakane badi baleja bupote buabu patoke.

¹⁷Muntu udibu batuma ne mukenji kayi uufikisha, udi ukengesha bantu.[46] Muntu wa nsongu udi uufikisha, udi usamba bantu.

¹⁸Muntu udi ubenga kuteleja badi bamukolesha, neashale mupele udibu bapetula. Kadi udi uteleja mubelu, neapete lumu.

¹⁹Dijinga didibu bakumbaja didi disankisha muoyi. Ke padi bantu bapote babenga kulekela malu mabi.

²⁰Udi wenda ne bena meji, udi upeta meji. Kadi udi wenda ne bidingidingi neashale kabidi tshidingidingi.

²¹Dikenga didi dilonda muenji wa bibi! Kadi diakalenga ke difutu dia bantu bakane.[47]

²²Muntu muimpe udi ushiya bumpianyi kudi ndelanganyi yende. Kadi mpetu ya babi, bakane badi bayipeta.

²³Budimi bua mupele budi bubodiodioka ne biakudia. Kadi bamue bantu badi bajimina bua malu abu mabi.

²⁴Udi ubenga kukuma muanende, kena mumunange to. Muntu udi munange muanende kena welakana bua kumunyoka to.

²⁵Muntu muakane udi udia ukuta. Kadi muntu mubi udi ukenga ne nzala.