Read Tshiluba Nsumuinu 14 Bible Online

Nsumuinu 14 - Tshiluba bible

Nsumuinu 14

¹Mukaji wa meji a bungi udi ushindika diku diende. Kadi mutatakane udi udibumbula.

²Muntu udi wenda mu njila wa buakane, udi utshina Maweja-Nangila. Kadi udi wenda mu njila mikonyangale udi umupepeja.

³Mu miaku ya muena dipote mudi ditambisha. Miaku ya bena meji idi ibepula ku njiwu.

⁴Muaba udi kauyi ngombe ya kudima nayi, mu diyeba mmutupu. Nyama ya dikanda idi ipetesha biuma bivule.

⁵Muntu udi ujadika bualu ne diyi dimue, kena ushima. Muntu udi ujadika bualu ne meyi meyi, mmuena dishima.

⁶Musekianganyi udi ukeba kupeta meji, kadi kena wapeta to. Muntu udi wela meji, udi umanya lukasa tshidiye ne bua kuenza.

⁷Umbuka kudi bidingidingi, bualu kudibi kuena upeta miaku idi mua kukulongesha malu.

⁸Muntu mudimuke udi mumanye tshidiye ne bua kuenza, bualu udi muena meji. Batshimbakane badi bapambuke bua bupale buabu.

⁹Batshimbakane kabena bavuluka mua kulongolola ntupakanyi. Kadi bantu bakane badi amu benzelangana bimpe.[48]

¹⁰Muntu yonsu udi mudimanye nkayende kanyinganyinga ne disanka bidi mu muoyi wende. Muntu mukuabu nansha umue kena mua kubiumvua menemene to.

¹¹Nzubu wa bantu babi udi ne kabutu, wa bantu bakane neashindame.[49]

¹²Bumue njila udi muntu umona bu mululame, ke udi umufila ku lufu.

¹³Nansha muntu udi useka udi mua kuikala mu dikenga. Nanku kunyima kua disanka kudi kushala amu dibungama.

¹⁴Muntu muena malu mabi neapete tshibawu tshia pa bubi buende. Bidi muntu muakane upeta nebimusankishe.

¹⁵Muena bitabataba udi witaba bionsu bidibu bamuambila. Kadi muntu mudimuke kena mua kuitaba kayi muanji kuela meji.

¹⁶Muntu wa meji udi utshina bualu bubi, ubuepuka. Kadi mutatakane udi upututuka, kayi wela meji ku bualu nansha bumue.

¹⁷Muntu udi ufika munda lukasa, udi wenza bualu bupote. Udi wela meji mabi, udi udikebela lukinu.

¹⁸Budingidingi ntshiuma tshia bantu batshimbakane. Kadi lumu lua bantu badimuke ke dimanya dia malu.

¹⁹Bantu babi nebikale ku bumfumu bua bantu bakane. Benji ba malu mabi nebimanyine ku biibi bia bantu bakane.

²⁰Muntu mupele badi bamubenga ne kudi muena mutumba nende. Kadi muena biuma udi ne balunda ba bungi.

²¹Muntu udi upepeja mukuende udi wenza bibi. Kadi muntu udi wenzela mupele bimpe udi muena diakalenga.

²²Bantu badi bela meji a kuenza bibi badi bapambuke. Kadi bantu badi bela meji mempe, bantu nebabanange ne muoyi umue.

²³Mudimu onsu udi ne diawu difutu. Kadi lubuakabuaka ludi lukeba bupele.

²⁴Biuma ke nsala wa kalumbandi wa bena meji. Kadi batatakane diabu difutu mbutatakane buabu.

²⁵Muntu udi ujadika bualu ne diyi dimue udi mua kupandisha bantu. Kadi udi ujadika ne dishima, udi ushiminyinangana malu.

²⁶Kutshina Maweja-Nangila ke kusomba ku matshi talalaa, bualu yeye udi ulama bana bende.

²⁷Ditshina dia Maweja-Nangila didi dipetesha muoyi; didi diepula muntu ku njiwu ya lufu.[50]

²⁸Lumu lua mukalenga wa ditunga ludi ku bungi bua bantu badiye nabu. Padi mukalenga kayi ne bantu, bumfumu buende kabuenaku to.

²⁹Muntu udi kayi ufika munda lukasa, udi ne lungenyi luvule. Kadi udi ufika munda lukasa, udi uleja bupote buende.

³⁰Bupole budi mu muoyi budi busanguluja mubidi. Kadi mukawu udi bu disama didi didia mifuba.

³¹Muntu udi ukengesha mupele, udi upenda Mvidi Mukulu wakamufuka. Kadi udi umuambuluisha, udi unemeka wakamufuka.

³²Malu mabi adi muntu mubi wenza adi amufila ku kabutu. Kadi muntu muakane udi utekemena kudi Mvidi Mukulu, nansha pakadiye pa kufua.

³³Muntu udi wela lungenyi udi ne meji. Kabena mua kusangana lungenyi kudi bantu batshimbakane to.

³⁴Kuenza malu makane nkuyisha ditunga kumpala. Kadi malu mabi adi akuatshisha ditunga bundu.

³⁵Mukalenga wa ditunga udi wanyisha balombodi ba lungenyi. Kadi udi utandisha badi kabayi nalu.