Read Tshiluba Nsumuinu 15 Bible Online

Nsumuinu 15 - Tshiluba bible

Nsumuinu 15

¹Diandamuna dilenga didi dituyisha lonji. Kadi diyi dibi didi dilundula tshiji.

²Miaku ya muntu wa meji idi ipetesha dijinga dia kulonga malu. Kadi mukana mua mutshimbakane mudi nnutangalaja amu malu mabi a bupote.

³Mesu a Maweja-Nangila adi atangila miaba yonsu. Udi ujooja bimpe ne babi.

⁴Miaku idi ikolesha muntu mu maboku, idi imusanguluja. Kadi miaku ya tshikisu idi inyanga muoyi wa muntu.

⁵Muntu mupote udi upetula mibelu ya tatuende. Kadi udi uyitaba udi uleja mudiye muena meji.

⁶Udi witaba Mvidi Mukulu udi usomba mu bubanji. Kadi mpetu mipeta ku malu mabi idi ilela dikenga.

⁷Miaku ya muena meji idi itangalaja dimanya. Kadi batshimbakane badi mu mitu mutupu.

⁸Maweja-Nangila udi udiwula milambu ya bantu babi. Kadi udi wanyisha bikole dilomba dia bantu ba diyi dimue.

⁹Maweja-Nangila udi udiwula nsombelu ya bantu babi. Kadi udi unanga badi balonda njila ya buakane.

¹⁰Badi banyoka bikole bantu badi bapambuka mu njila ya buakane. Kulengulula mibelu nkuya ku lufu.

¹¹Maweja-Nangila mmumanye bionsu, nansha bidi mu kandondu ka buloba. Nanku mudi muntu mua kusokoka Mvidi Mukulu malu adi munda muende mmunyi?

¹²Muena ditambisha kena musue badi bamubela. Kena ukonka bantu ba meji bualu nansha bumue.

¹³Muntu udi ne disanka udi ne mpala wa mimuemue. Kadi muntu udi ne kanyinganyinga udi ne minyengu mu mpala.

¹⁴Muntu udi wela meji udi musue kumanya malu. Kadi muntu mutatakane udi musue kulonga malu a bupale matuku onsu.

¹⁵Matuku onsu mukengi udi usomba mu dikenga. Kadi muntu wa dikasa dimpe udi usanka matuku onsu.

¹⁶Mbimpe kuikala mupele udi uvuluka Maweja-Nangila, pa mutu pa kuikala muena biuma, kadi muikale ne dipampakana.

¹⁷Mbimpe kudia matamba muaba udibu bakunanga, pa mutu pa kudia munyinyi wa manyi mukupa ne lukinu mu muoyi.

¹⁸Muntu wa lonji udi ukeba matandu, kadi muntu wa lutulu udi watuyisha.

¹⁹Muena lulengu udi utangila njila yonsu bu ya meba. Muntu muakane udi usangana miaba yonsu njila milongolola bimpe.

²⁰Muana wa balume wa meji udi usankisha baledi bende. Muntu mutshimbakane udi upepeja bana babu.

²¹Malu a bupote adi asankisha muntu udi kayi ne meji; kadi muntu udi wela meji, udi uya buludi mu njila wa buakane.

²²Pikala bantu kabayi bakonkangana lungenyi, mapangadika abu adi tshianana. Malu abu adi mua kukumbana, pikala bantu tshisumbu bafila ngenyi.

²³Padi muntu wandamuna nkonku biakane udi ne disanka, nangananga padiye ufila diandamuna kampanda pa tshikondu tshiadi.

²⁴Muntu wa lungenyi udi ulonda njila udi lunupetesha muoyi. Udi wepuka njila udi upueka mu kandondu ka buloba.

²⁵Maweja-Nangila udi ubumbula nzubu wa muena ditambisha, kadi udi ulama lupangu lua mukaji mukamba.

²⁶Maweja-Nangila udi udiombola meji mabi adi bantu bela, kadi udi wanyisha miaku ya dijingilangana nayi disanka.

²⁷Muntu udi ne lukuka lua biuma udi ukebela nzubu wende kabutu. Udi kayi wangata mabuejila nealale matuku mavule.

²⁸Muntu muakane udi wela meji bangabanga ne kuandamunaye. Kadi muntu mubi udi upututuka bua kujanangana.

²⁹Maweja-Nangila kena munange bantu babi. Kadi udi uteleja padi bantu bakane balomba.

³⁰Kutangila muntu ne musangelu kudi kumusankisha. Lumu luimpe ludiye upeta ludi lumusanguluja.

³¹Muntu udi uteleja mubelu udi mua kumuambuluisha, neasombe munkatshi mua bantu ba meji.

³²Muntu udi kayi musue kulonga malu, neadikengeshe yeye nkayende. Kadi udi uteleja mibelu neasombe biakane.

³³Udi utshina Maweja-Nangila udi upeta meji.[51] Udi udipuekesha ke udi mua kupeta lumu.