Read Tshiluba Nsumuinu 18 Bible Online

Nsumuinu 18 - Tshiluba bible

Nsumuinu 18

¹Muntu udi udinanga, udi udilamuna kudi bakuabu. Udi ufika munda padibu bafila meji makuabu.

²Mupote kena musue kumvua bidibu bamuambila. Kadi udi ujinga kuleja amu bidi mu meji ende.

³Bubi budi bukeba kadiwu; buenzayi budi bukeba bundu.

⁴Miaku ya muntu idi mua kuikala miondoke bu mayi manene malabale. Idi ipetesha muntu muoyi bu mudi mpokolu[57] ubudika mayi.

⁵Kubingishi muena tshibawu, kupishi muntu muakane.

⁶Miaku ya muntu mupote idi ikeba matandu. Tshidiye wamba tshidi tshikeba mvita.

⁷Mupote udi udikebela lufu, miaku yende ke buteyi budi bumukuata yeye nkayende.

⁸Miaku ya muena lunsonga idi bu bintu bisheme bidi bantu bafuilakana.

⁹Muntu udi ulengulula mudimu wende mmuanabu ne muntu udi uunyanga.

¹⁰Maweja-Nangila udi bu nzubu udibu bakolesha ne bimana. Muntu muakane udi unyemena kudiye, udi upanduka.

¹¹Kadi muena biuma udi utangila biuma biende bu tshimenga tshikolesha ne bimana, wela meji ne: ke bidi bindama.

¹²Bantu badi baditambisha nebabutuke. Udi udipuekesha neapete lumu.

¹³Muntu udi wandamuna lukonku kayi muanji kuteleja bimpe, udi uleja bupote buende; neafue bundu kabidi.

¹⁴Padi muntu utekemena ne: nempande, udi upanda. Udi kayi utekemena lupandu, udi mua kufua lukasa.

¹⁵Muntu wa lungenyi udi ujinga kumanya malu a bungi. Muntu wa meji udi ukeba kumvua miaku idi yamba bualu.

¹⁶Kupesha muntu tshintu, kudi kukunzuluila njila wa wewe kumonangana ne bantu banene.

¹⁷Muntu udi ulumbulula kumpala utu umueka bu mubinga. Kadi padi muena tshilumbu nende ufika, udi umupisha.

¹⁸Padibu batshinka,[58] baneme babidi badi ku tshilumbu, badi mua kumvuangana, kulekela matandu.

¹⁹Muanenu uuvua upenda udi bu tshimenga tshidibu bakolesha ne bimana: mbikole bua wewe kuakula nende. Matandu a bena muntu mmakole, adi bu milonda ya kukanga nayi bimana.[59]

²⁰Muntu udi uukuta ne diyi dia mukana muende. Tshidiye wamba tshidi mua kumudisha.

²¹Tshiudi wamba tshidi mua kukufila ku muoyi nansha ku lufu. Nanku paudi munange kuakula, wanyisha kabidi bionsu bidi miaku yebe mua kukupetesha.

²²Muntu udi mupete mukaji, udi mupete diakalenga. Ke dipa didi Maweja-Nangila umupesha.

²³Mupele udi wakula udionga, kadi muena biuma udi wakula utanda.

²⁴Muntu udi ne balunda ba bungi, bobu mene badi mua kumukebela dikenga.[60] Kadi mulunda muimpe mmupite ne muanenu.