Read Tshiluba Nsumuinu 19 Bible Online

Nsumuinu 19 - Tshiluba bible

Nsumuinu 19

¹Mbimpe kuikala mupele udi ulonda njila wa buakane, pa mutu pa kuikala mutatakane udi wakula ushima bantu.

²Muaba udi kauyi dimanya, disuminyina kadiena ne bua nsongu. Kudia lukasa nkupia mukana.

³Padi bantu badikebela makenga ku bupote buabu, badi bajana Maweja-Nangila.

⁴Biuma bidi bivudijila muntu balunda. Kadi mupele mmufuane wajimija wende umuepele udiye nende.

⁵Badi banyoka muntu udi ujadika malu a dishima. Udi udinga bantu mmuena tshibawu.

⁶Bantu ba bungi badi balabidila muntu munene. Bonsu badi badia bulunda ne tshipapayi.

⁷Mupele badi bamukina kudi bana babu. Yeye mupete bualu bunene, balunda bende badi bamubenga. Padiye ubasengelela, badi baya.[61]

⁸Kumanya mua kuela meji nkudienzela wewe nkayebe bimpe. Udi ukeba kujingulula malu neapete diakalenga.

⁹Badi banyoka muntu udi ujadika malu a dishima. Udi udinga bantu neabutuke.

¹⁰Muntu mutatakane katshia ki mmusombe mu bubanji. Mupika katshia ki mmutumine bamfumu diyi.

¹¹Muntu wa lungenyi nansha yeye mufike munda, udi amu ulama lutulu. Lumu luende mpadiye upua malu mabi avuabu bamuenzele muoyi.

¹²Tshiji tshia mukalenga tshidi tshikuata bowa bu muadi wa nyama wa ntambue. Kadi kalolu kadiye uleja muntu, kadi bu lumuma ludi lupueka pa bisosa, lufila tshitalela.

¹³Muana mutatakane udi ukengesha tatuende. Mukaji wa mutoyi udi bu mulondu mutubuke udi usukumuna mayi panshi.

¹⁴Nzubu ne biuma mbintu bidi muntu mua kupiana kudi batatuende. Kadi mukaji wa meji badi bamupetela amu kudi Mvidi Mukulu.

¹⁵Bufuba budi bubueja muntu mu dikenga. Udi ubika ne lulengu nealale ne nzala.

¹⁶Muntu udi unemeka mikenji neashale ne muoyi. Udi uyipetula neafue lukasa.

¹⁷Paudi upesha mupele tshintu, udi utshisombesha Maweja-Nangila. Yeye ke wakufuta mudimu webe wa luse.

¹⁸Ubele muanebe pautshidi ne diba dia kumubela. Kadi tshiji katshikufikishi ku dikebela bana njiwu ya lufu.

¹⁹Muena tshiji tshikole afute tshibawu. Wewe mubenge kumufutshisha, udi umusaka bua atungunuke.[62]

²⁰Teleja mibelu, wanyisha bua bakulongeshe. Nanku neushale muntu wa lungenyi.

²¹Muntu udi wela meji a bungi mu muoyi. Kadi amu bidi Mvidi Mukulu ujadika ke bidi bienzeka.

²²Bantu badi bananga muntu wa nsongu udi ne muoyi wa kalolu. Mbimpe kuikala mupele pa mutu pa kuikala muena dishima.

²³Muntu udi utshina Maweja-Nangila, neapete muoyi, neasombe mu bubanji kayi umona dikenga.[63]

²⁴Muena lulengu udi wela tshianza tshiende mu dilongu. Kadi kena ne bukole bua kutshinkisha mukana.

²⁵Paudi utuuta muntu udi uditambisha, mupote pende neadimuke. Paudi ubela muena lungenyi, udi umvua ne: badi bandongesha malu.

²⁶Muana udi unyanga tatuende, nansha wipata mamuende, mmuana mubi, udi ufuishangana bundu.

²⁷Muananyi, wewe mulekele kuteleja badi bakubela, neupue nansha bidibu bamane kukulongesha muoyi.[64]

²⁸Mujadiki wa malu a dishima udi utua ku ba wetu. Muntu mubi udi ujinga amu kuenza bibi.

²⁹Bena ditambisha nebabanyoke. Muntu mutatakane nebamutuute.