Read Tshiluba Nsumuinu 2 Bible Online

Nsumuinu 2 - Tshiluba bible

Nsumuinu 2

¹Muananyi, uvuluke bionsu bindi nulongesha, kupu muoyi bindi nkuambila bua wewe kuenza.

²Teleja bidi meji akuambila, udibambe bua kuajingulula.

³Ulombe diambuluisha kudi lungenyi, uteleje bidilu lukuambila diba dia dikenga.

⁴Ulukebe muudi ukeba tshiamu tshitoke tshia mushinga mukole, muudi ukeba biuma bivuabu basokoke.[6]

⁵Enza nanku, bua ulonge muudi mua kunemeka Maweja-Nangila, kumanya bumfumu budi Mvidi Mukulu nabu.

⁶Maweja-Nangila ke udi upangana meji. Dimanya ne dijingulula dia malu bidi bifuma kudiye.[7]

⁷Udi wambuluisha bantu badi babenga malu mabi. Udi bu mudi ngabu udi ulama badi benza biakane.

⁸Udi wambuluisha badi benzelangana bimpe, ulama badi badifila kudiye.

⁹Paudi unteleja, nenjingulule muudi mua kuikala muntu muakane, wa nsongu, muudi mua kuenza bidi bimpe.

¹⁰Newikale ne meji munda muebe. Dimanya nedikusankishe.

¹¹Dijingulula dia malu nedikuepule ku ntupakanyi. Lungenyi nelukulame.

¹²Nebikuepule ku dienza malu mabi, nebikumushe kudi bantu badi bashimangana,

¹³ne ku badi bapambuke mu njila miakane, bendela mu njila ya miidima.

¹⁴Badi bumvua disanka padibu benza bibi, badi basankila mu bubi.

¹⁵Bantu aba kabena benda patoke mu njila mululame, badi balonda amu mikonyangale.

¹⁶Kadi meji ne lungenyi nebikuepule, ku miaku ya lubombu ya mukaji udi kayi webe,

¹⁷ya mukaji udi mutombokele bayende wa ku buana, mupule nanku ndondu uvuaye mutue ne Mvidi Mukulu.[8]

¹⁸Paudi uya kudi mukaji awu, udi udikebela lufu. Bualu malu adiye wenza, adi afikisha bantu ku lufu.

¹⁹Muntu udi uyila mukaji awu, kena upingana kabidi to. Kena mua kupeta kabidi njila wa muoyi to.

²⁰Nenku, enda mu njila udi bantu bakane balonda. Idikija malu adi bantu bimpe benza.

²¹Bualu bantu bakane ne ba diyi dimue, nebase mu ditunga edi, nebashalemu kashidi.

²²Bantu badi kabayi bitabe Mvidi Mukulu, kabayi bamulamate, nebumukemu. Nebabipate kuabu.