Read Tshiluba Nsumuinu 20 Bible Online

Nsumuinu 20 - Tshiluba bible

Nsumuinu 20

¹Mvinyo udi ufikisha muntu ku matandu. Maluvu makole adi asaka muntu ku mutoyi. Muntu yonsu udi ubinua ukuatshika, kena ne meji.

²Mudibu batshina nyama wa ntambue udi ukungula, ke mudibu ne bua kutshina mukalenga udi mufike munda. Muntu udi ujula tshiji tshia mukalenga udi udikebela njiwu.

³Muntu wa meji udi wepuka matandu. Amu bantu bapote ke badi badibuejamu.

⁴Muena lulengu udi kayi udima mu tshikondu tshia mvula, kakupeta kantu mu tshikondu tshia dinowa bintu to.

⁵Meji adi munda mua muntu mmasokome, bu mayi adi munda mua buloba. Amu muntu wa lungenyi ke udi mumanye mua kuapatula munda mua muntu nende.

⁶Bantu ba bungi badi badisua, badiamba mudibu ne muoyi muimpe. Kadi bidi bikole menemene mua kupeta muntu wa nanku.

⁷Pikala muntu usomba nsombelu muakane ne wa kalolu, bana bashiyaye panu nebikale ne diakalenga.

⁸Pikala mukalenga musombe ukosa nsambu, udi utandula musangu umue muena dishima.

⁹Muntu kena mua kuamba ne: “Tshiena ne tshilema nansha tshimue. Kondu ka munda muanyi kakena kangasa tshilumbu.”

¹⁰Kupima bujitu nansha bule bua tshintu ne bipimu bia kudinga nabi bantu, nngenzelu udi Maweja-Nangila udiwula bikole.

¹¹Nansha muana, ku bidiye wenza, ukadi uleja muoyi udiye nawu. Mudimu udiye ukuata neuleje mudiye muakane, wa muoyi mulenga.

¹²Maweja-Nangila mmufuke mesu bua kumona, matshi bua kumvua.

¹³Pawanangila tulu neushale mupele. Kadi ujuke diba diakane, bua udie uukuta.

¹⁴Musumbi udi wamba ne: “Mmushinga mukole! Mmushinga mukole.” Kadi yeye mumane kuya pa nkayende udi udiela ka lumbandi ne disanka.

¹⁵Tshiamu tshia mpawungi ne busanga bidi bivule, kadi tshintu tshidi muntu kayi mua kusangana lukasa ke miaku ya meji.

¹⁶Pikala muntu mudieyeke kuudi bua dibanza dia muntu uudi kuyi mumanye, ukuate tshilamba tshiende lukole, bua muntu uudi kuyi mumanye.

¹⁷Tshiakudia tshiudi muibe tshidi tshisheme mukana. Kadi kunyima, mukana muebe mudi muwule ne nsoka tente.

¹⁸Bidi bantu bajadika bidi bikumbana padibu bafila meji malenga. Pawikala musue kuluangana mvita, anji kudilongolola bimpe.

¹⁹Muena bijanu udi usokolola nansha malu masokome. Nanku epuka muena tshiakulakula.

²⁰Padi muntu utshipa tatuende nansha mamuende, neamone matuku ende a panu akoseka bu mudi muendu ujima mu miidima.

²¹Muntu udi wangula biuma lukasa ku ntuadijilu, kakulubuluka nabi ku ndekelu to.

²²Kupingaji bibi pa bibi bidibu bakuenzela. Utekemene kudi Maweja-Nangila, yeye nkayende neakuambuluishe.

²³Maweja-Nangila udi udiwula majitu adibu bapima badinga bantu. Udi ubenga tshipimu tshia dishima.[65]

²⁴Maweja-Nangila ke udi ulombola muoyi wa muntu. Mudi muntu mua kumanya kudiye uya mbishi?

²⁵Kuamba lukasa ne: “Nendambule Mvidi Mukulu tshintu kampande,” nansha kumulaya bualu kuyi muanji kuela meji, nkudikebela njiwu.[66]

²⁶Mukalenga wa meji udi utandula benji ba bibi. Udi ubanyoka kayi ubafuila luse to.

²⁷Kondu ka munda ke muendu udi Maweja-Nangila mupeshe muntu, bua kumuleja patoke malu adiye nawu munda muende.

²⁸Padi mukalenga wa muoyi muimpe wenza malu mimpe, neashale ne muoyi. Padiye ukosa nsambu pa yoyi[67] udi ushindika bukalenga buende.

²⁹Dikanda dia bansonga ke buimpe buabu. Lumu lua bantu banunu ke nsuki yabu mitoke.

³⁰Mputa idi itusamisha ke idi ituambuluisha bua tudilengeje. Mituutu mikole ke idi yakaja meji etu.