Read Tshiluba Nsumuinu 21 Bible Online

Nsumuinu 21 - Tshiluba bible

Nsumuinu 21

¹Muoyi wa mukalenga udi bu musulu wa mayi udi Maweja-Nangila utuma kuonsu kudiye musue.

²Muntu yonsu udi wela meji ne: bionsu bindi ngenza bidi bimpe. Kadi Maweja-Nangila udi ulumbuluisha muntu bilondeshile malu adiye wipatshila.

³Muntu udi ulonda njila wa buakane, muikale kabidi ne muoyi wa kalolu, udi usankisha Maweja-Nangila, mupite muntu udi umulambula milambu.

⁴Mpala wa kapeja ne muoyi wa ditambisha ke bidi bileja bubi bua muena lonji.[68]

⁵Muntu wa disuminyina, ukuata kabidi mudimu ne meji, udi upeta tshipeta. Kadi udi wenza malu mu tshipututuku, neabuele mu tshiyole tshia nzala.

⁶Bantu badi bapeta biuma ne didinga mbantu bapote, badi bafika ku lufu.

⁷Tshikisu tshia bantu babi tshidi tshibabutula, bualu badi babenga kulonda njila wa buakane.

⁸Bena tshibawu kabena balonda njila mululame to. Kadi bantu bakane badi benda amu buludi mu njila wa buakane.

⁹Mbimpe kusomba talala mu kazubu, pa mutu pa kusomba mu nzubu munene pamue ne mukaji wa mutoyi.

¹⁰Muntu mubi udi ukeba mua kuenzela bakuabu bibi. Kena umvuila nansha mulunda wende luse.

¹¹Padibu banyoka muena ditambisha mupote udi upeta meji. Kadi muntu wa meji udi ulonga malu ku bionsu bidibu bamulongesha.

¹²Mukalenga muakane[69] udi umona bionsu bidi bienzeka mu nzubu mua bantu babi. Udi ubabueja lukasa mu dikenga.

¹³Muntu udi ubenga kuteleja lubila lua muena dikenga, nebabenge kuteleja kabidi luende diba didiye mu dikenga.

¹⁴Dipa dia mu musokoku didi ditalaja tshiji. Kusankisha muntu ne tshintu mu musokoku kudi kutuyisha tshiji tshikole.

¹⁵Muntu muakane udi usanka padibu bakosa nsambu pa yoyi. Kadi ke bidi bikuatshisha muntu mubi bowa.

¹⁶Muntu udi umbuka mu njila wa bena meji, neaye kusomba lukasa kaba kamue ne bantu bafue.

¹⁷Udi unanga masanka a mubidi neashale mupele. Munu wa mvinyo nansha mudiavi, kena mua kupeta bubanji to.

¹⁸Muntu mubi udi kayi ulamata Mvidi Mukulu, kayi ulama meyi ende, neabuele mu dikenga, pa mutu pa bantu bakane badi benza amu bidi Mvidi Mukulu musue.

¹⁹Mbimpe kuasa nkaya mu tshipela, pa mutu pa kusomba mu nzubu pamue ne mukaji muena tshiji ne mutoyi.

²⁰Mu diyeba dia muena meji mudi biakudia bivule ne bintu bikuabu bia mushinga mukole. Kadi muntu mutatakane udi ujimija bionsu bidiye nabi.

²¹Muntu wa disanka udi ulonda njila wa buakane. Neasombe matuku mavule panu. Bantu nebamunemeke, bamusankishe kabidi.

²²Muena meji udi mua kukuata tshimenga tshidi bilobu bilame. Udi mua kushimbula bimana biatshi bivua bena ditunga batekemena.

²³Muntu udi udilama ku bionsu bidiye wakula, udi udiepula ku makenga mavule.

²⁴Muntu udi upepeja bantu, uditambisha, kena wangata tshintu nansha tshimue ne mushinga. Malu onsu adiye wenza adi aleja mudiye uditambisha kashidi.

²⁵Majinga adi muena lulengu nawu adi amushipa, bualu bianza biende kabiena binanga kukuata mudimu.

²⁶Bantu bakuabu badi bapitshisha matuku abu mu dijinga dia bintu. Kadi muntu wa nsongu udi upeshangana bintu kayi utabala.

²⁷Bantu babi badi balambula milambu mibi, nangananga padibu bayilambula ne meji mabi.

²⁸Kabena bitabe[70] bualu budi muena dishima ujadika to. Kadi muntu udi wamba amu biwaye mumvue, nebamuteleje.

²⁹Muntu mubi udi wenda ne dikima. Kadi muntu muimpe udi wenza malu ende onsu kayi upampakana.

³⁰Meji, lungenyi nansha dimanya bidi tshianana, paudi uluisha Maweja-Nangila.

³¹Badi bavuadika nyama ya tubalu bia kuluangana nabi, bua kuya mu mvita. Kadi anu Maweja-Nangila ke udi utshimuna.