Read Tshiluba Nsumuinu 22 Bible Online

Nsumuinu 22 - Tshiluba bible

Nsumuinu 22

¹Mbimpe kuikala ne lumu luimpe, pa mutu pa kuikala ne biuma bia bungi. Mbimpe bantu bakuanyishe pa mutu pa wewe kupeta mpawungi ne tshiamu tshitoke tshia mushinga mukole.

²Muneme ne mupele, mbantu bamue. Maweja-Nangila ke udi mubafuke bonsu babidi.

³Muntu mudimuke udi umona dikenga diamba kumukuata, udiepuka. Bantu batatakane badi babuelamu musangu umue, badikengeshisha.

⁴Muntu muena bupuekele udi utumikila Maweja-Nangila, neapete bubanji ne lumu; nealale matuku mavule panu.

⁵Meba ne mateyi bidi mu njila wa bena buenzayi. Udi musue kulala panu udi ubiepuka.

⁶Leja muana diakamue njila muimpe udiye mua kulonda. Nanku neashale kumulama too ne pa kulakajaye.[71]

⁷Mubanji udi mfumu wa mupele. Bantu badi basombangana bintu, badi bapika ba badi babasombesha.

⁸Udi ukuna malu mabi udi upola dikenga; dikombu didiye utuutangana nadi neditshibuke.

⁹Muntu udi wenzelangana bimpe, Mvidi Mukulu neamuele lupemba, bualu tshiende tshiakudia udi wabanyangana ne bapele.

¹⁰Ipata muena ditambisha, matandu neakoseke, mitoyi ne bipendu nebijike.

¹¹Pikala muntu musue kudia bulunda ne mukalenga, ikale ne muoyi muimpe, amanye kabidi mua kuakula bimpe.

¹²Maweja-Nangila udi musue bua bantu bamanye malu malelela. Ke mudiye ujandula miaku ya bantu bena dishima.

¹³Muena lulengu utu wamba ne: “Nyama wa ntambue udipu. Tshiena mua kupatuka bua kabayi kundiila mu njila.”

¹⁴Miaku ya lubombu ya bakaji bena buendenda, mbuteyi budi bukuatshisha bowa. Badi baponamu kudi muntu udi Maweja-Nangila mudiwule.[72]

¹⁵Bupale budi munda mua nsongalume. Nkodi idi imupandisha ku njiwu eyi.

¹⁶Muntu udi ukengesha mupele neamututshishe ku ndekelu dikasa dimpe. Udi upa mubanji bintu, neadibueje mu bupele.[73]

¹⁷Teleja umvua bimpe, ndi nkumanyisha miaku mimpe ya bena meji. Uvuluke mu muoyi webe malu andi nkuambila.

¹⁸Newikale muena diakalenga, pawikala uvuluka malu andi ngamba, walongesha kabidi bantu bakuabu.

¹⁹Ndi musue bua utekemene kudi Maweja-Nangila. Ke pandi nkulongesha kabidi malu lelu.

²⁰Ndi mukufundile mibelu makumi asatu[74] idi mua kukuelesha meji.

²¹Mibelu ayi neikulongeshe malu malelela. Pikala muntu ukuebeja malu, nenku neumumanyishe amu malu malelela.

²²Kunyengi mupele bintu, bua padiye kayi ne bukole. Kupishi muntu ku tshilumbuluilu, udi kayi ne mumulumbuluidi.

²³Bualu Maweja-Nangila neabakuile; kabidi neashipe badi babanyenga bintu.

²⁴Kuena mua kudia bulunda ne muntu muena tshiji. Kuendi ne muntu udi ufika munda lukasa.

²⁵Bualu neuvue kuidikija malu abu, kuyi mua kudilengeja kabidi to.

²⁶Kuena mua kudieyeka bua mabanza a bende to.[75]

²⁷Pawikala kuyi ne tshintu tshia kuhita, nebakunyenge bulalu buebe mene.

²⁸Kutentuludi mukalu wa kale uvua bankambua bebe bela bua kuleja bunene bua lupangu.

²⁹Wewe mumone muntu wenza mudimu wende bimpe: muntu ewu udi mua kukuatshila nansha bamfumu mene mudimu, pa mutu pa kunkuatshila bantu ba lukutukutu.