Read Tshiluba Nsumuinu 23 Bible Online

Nsumuinu 23 - Tshiluba bible

Nsumuinu 23

¹Pawikala udia ku mesa ne muntu muneme, umanye bimpe uudi musombe nende ku mesa.[76]

²Wadikandika, kudileji muudi muena budiavi.

³Biakudia biende bisheme kabikusaminyi muoyi. Bumue badi mua kukupeshabi ne lungenyi lubi.

⁴Kuipatshidi biuma. Kuteki nansha meji ebe koku.

⁵Bualu biuma bidi bijimina kuyi muanji kubimona bimpe. Bidi bibuka mudi nyunyi wa tshiminyi ubuka mulu, uya kule.

⁶Kuena mua kudia kua muena muoyi mubi. Kuena mua kualakana biakudia bisheme bidiye ukupesha.

⁷Bualu meji adiye wela munda muende kaena afuanangana ne malu adiye wenza. Udi ukuambila ne: “Diaku, nuaku.” Kadi muoyi wende kawena kuudi.

⁸Biakudia bitshiya munda neubiluke. Lumbandi luudi umuela nelujimine patupu!

⁹Kuambidi mutshimbakane bualu. Kena wangata miaku yebe ne mushinga to.

¹⁰Kutentudi mikalu ya kale bua wewe kunyenga bana ba nshiya lupangu.

¹¹Bualu badi ne mubalumbuluidi wa bukole buonsu, ke Mvidi Mukulu. Neabasombuele kuudi.[77]

¹²Teleja bimpe badi bakulongesha. Teya matshi ku miaku ya badi bakubela.

¹³Kupampakanyi bua kunyoka muanebe to. Manyoka mimpe kaena amushipa nansha.

¹⁴Kadi adi mua kumuepula ku njiwu ya lufu.

¹⁵Muananyi, pawikala munange meji, nengikale ne disanka dinene.

¹⁶Nensanke pandi ngumvua muudi wamba malu ne lungenyi.

¹⁷Kuena mua kuidikija malu adi bantu babi benza. Kadi utshine Maweja-Nangila matuku onsu.

¹⁸Nanku neusanke matuku adi kumpala. Kuakufua bundu to.

¹⁹Unteleje bimpe, wewe muananyi. Nanku newikale muntu wa meji. Newende buludi mu njila webe.

²⁰Lekela kuenda ne bantu badi bakuatshika maluvu, kabidi ne badiavi ba minyinyi.

²¹Bualu badiavi ne banuavi nebabuele mu dikenga. Bafuba nebavuale bitetela.

²²Teleja tatuebe, bualu mmukulele. Kupepeji mamuebe pakadiye mukulakaje.

²³Ikala muntu udi wamba malu malelela, muedi wa meji, muntu mudimuke ne wa lungenyi. Wewe mumane kupeta ngikadilu eyi, kuyinyangi to.

²⁴Tatu udi mulele muntu wa kalolu ne wa meji udi ne disanka dipite bunene.

²⁵Usankishe tatuebe ne mamuebe nanku. Mamuebe apetele diakalenga adi kuudi.

²⁶Muananyi, ngitaba. Sanka bua umfuane meme.

²⁷Wamanya ne: mukaji muena tshiendenda ne mukaji wa bende badi bakukebela njiwu bu mudi tshiina tshile tshibulakane.[78]

²⁸Badi balaminangana mu njila bu mudi bivi benza. Bakadi bamane kupambula bantu bapite bungi.

²⁹Udi mu dikenga, unyingalala mmuntu kaayi? Udi utandangana, udididila matuku onsu nnganyi? Udibu batuuta kapayi bualu mmuntu kaayi? Udi ne mesu kunzuu bu kapia nnganyi?

³⁰Ke muntu udi unua mvinyo matuku onsu, usambakaja kabidi ne maluvu makole kayi wikisha.

³¹Kunangidi mudi mvinyo mukunze wengelela mu dikopu. Neapueke bitekete bitekete pa muminu webe.

³²Kadi ku nshikidilu ne udiumvue bu muntu musuma kudi nyoka, muela lulengu mu mubidi kudi nyoka wa ntoka.

³³Mesu ebe neamone bintu bia bilengulengu. Lungenyi luebe ne miaku yebe nebitshiompakane.

³⁴Neudimone bu muntu udi mu mayi manene, utenkakana kulu kua mutshi wa majuwa.

³⁵Newambe ne: “Bavua bantapa mputa, bantuuta tshiyi mumvue, tshiyi mumanye. Pandi njuka, nendabule kabidi makuabu!”