Read Tshiluba Nsumuinu 24 Bible Online

Nsumuinu 24 - Tshiluba bible

Nsumuinu 24

¹Kuikadi ne muoyi wa kuidikija bantu babi. Kujingi mua kuendakana nansha nabu.

²Badi bajinga amu kuenza malu ne tshikisu. Badi bayukila amu bua malu mabi adibu bakeba kuenza.

³Muntu udi wasa nzubu padiye mumanye kuenza nanku. Udi usombamu bimpe amu padiye ne lungenyi.

⁴Udi uuja mayeba ne bintu bilenga bia mushinga mukole amu padiye ne dimanya.

⁵Meji a muntu ke bukole buende. Dimanya diende didi divudija bumfumu buende.[79]

⁶Udilongolole bimpe paudi uya kuluangana mvita. Ulonde meji a bungi adibu bakupesha bua wewe kutshimuna mvita.

⁷Muntu mupote kena mua kumvua tshidi bena meji bamba. Nanku kena ne bua kuakula padi bena meji balongolola malu a ditunga.

⁸Muntu udi wela meji a kuenza bibi, udi upeta lumu bu lua muena buenzayi.

⁹Meji adiye wela adi amufikisha ku bubi. Bantu kabidi kabena bananga muntu udi useka bakuabu.

¹⁰Paudi utekesha mu maboku diba diudi mu dikenga, bukole buebe mbumane kujika!

¹¹Enza muebe muonsu bua kusungidila badibu bafundila tshibawu tshia lufu, badibu baya nabu ku tshishipelu kapayi bualu.

¹²Wewe muambe ne: “Tshivua mumanye,” kadi Mvidi Mukulu mmumanye muoyi uudi nawu. Yeye ke udi usunguluja tshiudi wipatshila. Udi ukumona. Udi mumanye malu onsu. Udi ulumbuluisha muntu yonsu bilondeshile bidiye wenza.

¹³Udie buitshi, muananyi, bualu buitshi mbusheme mukana, kabidi budi bukolesha mubidi.

¹⁴Kadi wavuluka ne: meji mempe neakusankishe kabidi bikole. Pawikala wenza nawu mudimu, neakulongeshe. Neusanke matuku atshidi kumpala. Biudi utekemena neubipete.

¹⁵Kukebi kunyenga nzubu wa muntu muakane ne budimu, bu mudi muntu mubi wenza. Kumunyengi muaba udiye usomba.

¹⁶Muntu muakane, nansha bobu bamukengesha amu kumukengesha, neajuke amu kujuka. Kadi bantu babi, muluishi neabashinde kashidi.

¹⁷Kusanki padi muluishi webe udishinda. Kuji maja padi dikenga dimukuata.

¹⁸Maweja-Nangila yeye mukumone wenza nanku, kakuanyisha to. Bumue kakunyoka kabidi muluishi webe awu to.

¹⁹Kukebi kufuilakana ne bantu babi. Kujingi mua kuidikija malu a benji ba bibi.

²⁰Kabena ne tshidibu mua kutekemena. Diakalenga diabu didi bu muendu udi wenda ujima.

²¹Muananyi, unemeke Maweja-Nangila, unemeke ne mukalenga kabidi. Kubuelakanyi ne bantu badi basue kukudimuna malu onsu.

²²Bualu bantu ba nanku badi mua kubutuka musangu umue. Kuena mumanye kabutu kadi Mvidi Mukulu nansha mukalenga mua kubatumina.[80]

²³Bena meji badi bamba kabidi ne: Tshibawu mpolonto mpolonto, wasa kudi tshibawu kuashi kudi muanenu.

²⁴Padi ndumbulula ubingisha muena tshibawu ne: “Kuena ne bualu,” bantu bonsu nebamukine, bamutshipa.

²⁵Kadi bantu badi banyoka muena tshibawu badi bimpe. Bantu bonsu nebabele ka lumbandi.

²⁶Muntu udi wandamuna patoke udi uleja mudiye mulunda wa bushiwa.

²⁷Bangabanga ne kuasa nzubu, anji kujikija midimu yebe ya pambelu, udime madimi ebe bua unowe biakudia.

²⁸Kufundi muena mutumba nebe ku tubadi padiye kayi ne bualu. Udi musue kushima bibi nenku bua tshinyi?

²⁹Kuambi ne: “Nemmuenzele muvuaye mungenzele. Nemmupingajile lupetu luvuaye mumfutshishe!”

³⁰Dimue dituku, mvua mupitshile pabuipi ne budimi bua mvinyo bua muena lulengu mububakane,

³¹buvua bumena buonsu meba a mingonga ne lupela. Bimana bia lupangu bivua biupuke panshi!

³²Meme kuela meji ku bionsu bimvua mumone. Ke meme kujingulula ne:

³³paudi ulala katantshi kipi, ubungila tshitupa, ushala mudiolola, maboku mavunge pa tshiadi,

³⁴ke padi bupele bukukuata tshimpitshimpi bu muivi, ke padi dikenga dikufikila bu muntu udi upawula nzubu ya bende.[81]