Read Tshiluba Nsumuinu 29 Bible Online

Nsumuinu 29 - Tshiluba bible

Nsumuinu 29

¹Muntu udi uteka mutu mukole padibu bamubela, dimue neabutuke kakuyi tshidi tshikandika.

²Padi bantu badi bitaba Mvidi Mukulu bavule,[97] bantu badi ne disanka. Kadi muntu wa tshikisu yeye muangate bumfumu, bantu bonsu badi batua mikemu.

³Munangi wa meji udi usankisha tatuende. Kadi muyidi wa bakaji ba tshiendenda udi unyanga lupetu luende.

⁴Mukalenga udi ukosa nsambu ya bantu bende biakane, udi ubatutshisha dikasa dimpe. Kadi udi ubalambuisha bitadi bipite, udi ubabutula.

⁵Muntu udi ulabidila balunda bende, udi uditeya bukondu mu njila yeye nkayende.[98]

⁶Bantu babi badi bapona mu mateyi avuabu bateye. Kadi bantu badi batshina Mvidi Mukulu badi tente ne disanka.

⁷Muntu udi ulamata Mvidi Mukulu udi ujingulula tshidi mupele ne bua kupeta. Kadi muntu mubi kena ne lungenyi elu to.

⁸Bantu badi kabayi banemeka bantu nabu badi bajuudija tshimvundu mu tshimenga. Kadi bantu ba lungenyi badi babatamija bantu badimu.

⁹Padi muntu wa meji ku tshilumbu ne muntu mutshimbakane, mutshimbakane awu mufike munda nansha museke, muntu wa meji kena upeta dikisha to.

¹⁰Bantu badi bashipangana badi bakina bantu bakane. Kadi bantu ba muoyi muimpe badi bakeba mua kuenda ne bantu bakane.

¹¹Mutshimbakane udi uleja tshiji tshionsu tshidiye natshi. Kadi muntu wa meji udi udikolela, utalaja tshiji tshiende.

¹²Padi mfumu witaba malu a dishima, bonsu badi kuinshi kuende nebandamuke bena dishima.

¹³Mupele ne mukengeshi wa bantu badi bafuanangana ku bualu bumue: Maweja-Nangila mmubapeshe mesu bubidi buabu.

¹⁴Mukalenga wa ditunga udi ulumbuluisha bapele ne buakane, bumfumu buende budi bushindama kashidi.

¹⁵Manyoka ne mibelu bidi bilongesha muntu. Kadi muana udibu kabayi bambila bualu udi ufuisha mamuende bundu.

¹⁶Padi bantu babi bavulangana, bubi kabidi budi buvulangana. Kadi dimue dituku, bantu bakane nebamone mudi babi babutuka.

¹⁷Paudi ukolesha muanebe ne disu dikole, kakukufuisha bundu nansha. Kadi neakusankishe bikole.

¹⁸Padi bambi kabayi bamanyisha malu a kudi Maweja-Nangila, bantu badi basomba mu bubi. Kadi muntu udi ulama mikenji ya Mvidi Mukulu mmuena diakalenga.

¹⁹Kabena babela mupika ne miaku nkayayi, bualu, nansha yeye mumvue tshidibu bamuambila, kena witaba to.

²⁰Wewe musangane muntu wakula kayi wela meji, mbimpe kutekemena kudi mutshimbakane pa mutu pa kutekemena kudiye.

²¹Mupika uudi wengeleka biangatshile ku buana, ku ndekelu neakebe kupiana bintu biebe bionsu.[99]

²²Muntu wa tshiji udi ujuula matandu. Udi ubinduluka lukasa lukasa udi uvudija bilema biende.

²³Muntu udi uditambisha neupuke milongu. Kadi bua kupeta lumu, bidi bimpe kuikala ne bupuekele bua muoyi.

²⁴Udi umvuangana ne muivi udi udienzela bibi. Udi mumanye diakabi[100] didiye mua kupeta, kadi kena musue kuamba bualu.

²⁵Udi utshina bantu udi uditeya nkayende. Kadi muntu udi uditeka mu bianza bia Maweja-Nangila udi usomba talalaa.

²⁶Bantu ba bungi badi bakeba bua mfumuabu abanyishe. Kadi kua Maweja-Nangila muntu yonsu neapete tshidiye ne bua kupeta.

²⁷Bantu bakane badi bapepeja bantu ba malu mabi. Bantu babi badi bapepeja bantu bakane.