Read Tshiluba Nsumuinu 3 Bible Online

Nsumuinu 3 - Tshiluba bible

Nsumuinu 3

¹Muananyi, kupu dilongesha dianyi muoyi. Kadi uvuluke mibelu yanyi.

²Wewe muyilame, neusombe bimpe panu; neulalepu matuku mavule; newikale ne diakalenga.

³Wikale muena dinanga ne muena muoyi umue. Ngenzelu eyi ikale bu webe nsala wa lumu. Uyifunde mu muoyi webe.

⁴Nenku, nebakunange kudi Mvidi Mukulu ne kudi bantu. Neumwangane nabu.

⁵Kulondi amu lungenyi luebe wewe nkayebe. Kadi utekemene muebe muonsu kudi Maweja-Nangila.

⁶Umulamate mu bionsu biudi musue kuenza. Yeye neakuleje muudi ne bua kuenza.

⁷Lekela kuditangila bu muena meji. Kadi tshina Maweja-Nangila, epuka bubi.[9]

⁸Ke buanga budi buondapa mubidi webe mujima. Nebukepeshe ntatu yebe.

⁹Ela Maweja-Nangila tuasakidila, umulambule bia ku midimu yebe, umulambule bintu bia tshianyi.

¹⁰Nenku neuvudije mayeba tente ne ntete ya bukula. Mabungu ebe neuwule tente ne maluvu.

¹¹Muananyi, anyisha bua Maweja-Nangila akuludike; kupepeji mibelu yende to.

¹²Bualu Maweja-Nangila udi unyoka udiye unanga, amu mudi tatu unyoka muanende udiye musue.[10]

¹³Muntu udi mupete meji, muikale ne lungenyi, mmuena diakalenga.

¹⁴Bualu muntu udi mupete meji, mmupite udi mupete tshiamu tshitoke tshia mushinga mukole, nansha mpawungi.

¹⁵Meji adi mapite busanga. Kakuena tshintu tshikuabu tshidi muntu ujinga,[11] tshidi mua kufuanangana nawu.

¹⁶Meji adi ambuluisha muntu bua kulala panu matuku mulongulongu. Adi amupetesha bubanji ne lumu.

¹⁷Adi amuendesha mu njila wa diakalenga, mudiye wenda amu mu bupole.

¹⁸Meji adi mpokolu wa muoyi ne wa diakalenga, kudi bantu badi benza mudiwu abalongesha.[12]

¹⁹Maweja-Nangila wakenza buloba ne meji ende. Kufikaye diulu ne lungenyi luende.

²⁰Mayi a panshi kutangalaka pa buloba, mavuba kulokesha mvula,[13] amu ku dimanya diende.

²¹Muananyi, tekemena lungenyi ne meji. Nebikuludike kashidi. Kubilekedi.

²²Nebikusombeshe panu mu disanka; nebikupeteshe muoyi wa bushuwa.

²³Nentungunuke bimpe ne malu ebe kabiyi bikuatshisha. Tshintu nansha tshimue katshiena mua kukuenzela bualu.

²⁴Dilolu neulale kuyi umvua bowa. Bufuku tulu tuebe netuikale amu talalaa.

²⁵Kuakutshina malu adi akuenzekela mu mpukapuka, nansha bantu babi badi bakuluisha.

²⁶Bualu Maweja-Nangila neakulame mu bupole, neakumushile mateyi. Unange muntu nebe

²⁷Paudi ne tshintu, ambuluisha natshi muntu udi utshikengela.

²⁸Padi muntu ukulomba tshintu tshiudi natshi, umupe. Kumulayi bua kupinganaye maloba.

²⁹Kuedi meji a kuenzela muena mutumba nebe malu mabi. Udi usomba amu pabuipi nebe, mukutekemene.

³⁰Kutandishi ku bukole mukuenu, padiye kayi mukuenzele bualu bubi.

³¹Kubabi bantu babi, kuidikiji mudibu benza.

³²Bualu Maweja-Nangila udi udiwula bantu badi benza malu mabi, kadi udi umvuangana ne bantu bakane.

³³Maweja-Nangila udi utshipa nzubu ya benji ba malu mabi; kadi udi wela ya bantu bakane lupemba.

³⁴Maweja-Nangila udi upetula badi bamupetula; kadi udi unanga bantu bapuekele.[14]

³⁵Bena meji nebapete diakalenga, batshimbakane nebikale ne bundu.