Read Tshiluba Nsumuinu 30 Bible Online

Nsumuinu 30 - Tshiluba bible

Nsumuinu 30

¹Telejayi muvua Agure, muana wa Yake muambe. Uvua mumanyishe Itiyele, Itiyele ne Ukale[101] ne:

²“Bushuwa, ndi tshidingidingi ku bantu bonsu. Tshiena ne lungenyi nansha lukese lua bumuntu.

³Tshivua nansha mupete meji, avua mua kunjinguluila mudi Mvidi Mukulu wa tshijila.

⁴Udi mubande mu diulu mua Mvidi Mukulu, kabidi mutulukemu nnganyi? Udi mukuate lupepele mu bianza biende nnganyi? Udi muvungile mayi mu tshilamba tshiende nnganyi? Udi mufundile buloba mikalu nnganyi? Dina diende nnganyi? Dina dia muanende nnganyi? Paudi mudimanye, udingambile!

⁵“Bionsu bidi Mvidi Mukulu ulaya udi ubikumbaja. Udi ngabu wa mvita, udi ulama muntu yonsu udi usokomena kudiye.

⁶Kusakididi muaku nansha umue ku miaku yende. Tshianana neakutandishe, neakuleje muudi muena dishima.”

⁷“Mvidi Mukulu wanyi, ndi nkulomba malu abidi. Uampeshe too ne ku lufu luanyi.

⁸Ungambuluishe bua tshishimi bantu bakuabu. Kabidi tshikadi mubanji munene, tshikadi mupele menemene. Kadi umpe amu bindi nkengela panu.

⁹Bualu meme ne bintu bipite bungi, ndi mua kukuvila ne: ‘Tshidi Mvidi Mukulu wenza ntshinyi?’ Kadi meme mupele menemene, ndi mufuane kuiba, bua kupepeja nanku Mvidi Mukulu wanyi.”

¹⁰Kunyangidi muena mudimu lumu kudi mfumuende. Wewe mulunyange, muena mudimu awu neakuele mulawu, nanku neufute tshibawu tshia lunsonge luebe alu.

¹¹Kudi bantu badi batshipa batatuabu, bajana bamamuabu misangu yonsu.

¹²Kudi bantu badi bela meji ne: tudi bantu bimpe. Kadi ki mbapange manyanu pambidi pabu.

¹³Bantu bakuabu badi batangila bantu nabu ne kapeja, badiela mulu.

¹⁴Kudi bantu badi ne menu bu miele ya kuluangana nayi mvita, badi ne binyanganyanga bitue bu tuele. Badi bavuambula bakengi ba mu ditunga, bumusha bapele munkatshi mua bantu[102] bakuabu.

¹⁵Musundu wa mu mayi udi ne bana ba bakaji babidi badi bamba ne: “Mpesha! Mpesha!” Kudi bintu bisatu bidi kabiyi bianji kudia kuukuta, kabiyi bianji kuamba ne: “Biakumbanyi.”

¹⁶Ke kandondu ka bafue, mukaji udi kayi ne bana, buloba buume budi bukengela mvula. Kadi kudi kabidi tshintu tshinayi: ke kapia kadi kakayi kamba ne: “Ndi muukute!”

¹⁷Padi muntu useka tatuende, nansha ubenga kuitaba ku diyi dia mamuende, bikololu nebimutonkole mesu, biminyi nebimudie.

¹⁸Kudi bintu bisatu bindi tshiyi mua kumvua: mudi nyunyi ya tshiminyi ibuka mulu, mudi nyoka ulandala pa dibue, mudi majuwa enda munkatshi mua mayi manene. Kadi kudi kabidi tshinayi tshindi tshiyi ngumvua: mudi mulume usangana njila udi umufikisha kudi mukaji.

²⁰Mukaji udi kayi ulamata bayende, udi wenda tshiendenda, wowa mayi, wamba ne: “Tshiena muenze bualu bubi nansha bumue.” Udi udiumvua amu bu muntu mumane kudia, ukupula ku mishiku.

²¹Kudi malu asatu adi bantu kabayi mua kuanyisha, bualu adi akemesha buloba bujima:

²²ke mupika udi ushala mukalenga wa ditunga, mutshimbakane udi udia ondoloka,

²³mukaji wa malu makole udibu basela. Kadi kudi kabidi bualu buinayi: muena mudimu mukaji udi upingana pa muaba wa mukaji uvua mfumuende.

²⁴Mudi mishindu inayi ya nyama mikese, kadi mikale ne meji a bungi pa buloba:

²⁵tunkenene katuena ne bukole. Kadi tudi tukungija bintu mu tshikondu tshia luya,

²⁶nyama ya damane[103] kayena ne bukole. Kadi idi yumbula mena ayi mu mbuebue,

²⁷mpasu kayitu ne mfumu. Kadi idi yenda bimpe mu milongu,

²⁸misodi idibu mua kukuata ne tshianza, idi ibuela nansha mu nzubu ya bakalenga ba ditunga.

²⁹Kudi bintu bisatu bidi bienda madiunda, bitua ntunku pa buloba, mbiebi:

³⁰nyama wa ntambue udi upita nyama yonsu ku bukitu, kayi utshina tshintu nansha tshimue,

³¹nzolu wa tshitala wa nkele ne mbuji wa mpumbu. Kadi kudi kabidi tshintu tshinayi: Ke mukalenga udi wenda kumpala kua tshiluilu tshiende.[104]

³²Wewe ne tshibidilu tshia kuditambisha, pashishe ubanga kuela meji, bituadija ku lelu lama ludimi luebe bimpe!

³³Bualu manteka badi baapeta padibu batuuta mabele. Mashi adi apatuka mu diulu padibu batuuta tshintu ku diulu. Nenku kutuuta muntu mu tshiji nkusonsola matandu.