Read Tshiluba Nsumuinu 31 Bible Online

Nsumuinu 31 - Tshiluba bible

Nsumuinu 31

¹Telejayi mibelu ivua Lemuwele, mukalenga wa bena Masha,[105] mupete kudi mamuende:

²“Muananyi, teleja! Wewe ke muananyi wa munda, umvua mulombe kudi Mvidi Mukulu pamvua mumutendelele.

³Kufidi bukole buebe buonsu amu kudi bakaji. Bualu bakaji bakadi bajimija bakalenga ba bungi.

⁴Lemuwele, umanye bimpe ne: bakalenga ne bamfumu badimukile maluvu makole.

⁵Bualu padibu bakuatshika, badi bapua mikenji muoyi, kabayi bakosa bimpe nsambu idi bapele nayi.

⁶Kadi maluvu ikale nangananga a bantu badibu baya nabu ku lufu, nansha a badi mu dikenga dikole.

⁷Bualu padibu banue maluvu bakuatshike, nebapue makenga abu ne bupele buabu muoyi.

⁸Kadi wewe akuila muntu udi kayi ne mushindu wa kudilumbuluila. Lumbuluila bonsu badibu badiombola.

⁹Ubakuile, ukose nsambu pa yoyi. Ulumbulule bilumbu bia bapele ne bakengi.[106]”

¹⁰Mukaji wa tshitembu, mbikole bua kumupeta! Udi mupite mabue a busanga ku mushinga.

¹¹Muoyi wa bayende udi amu kudiye. Udi ulama bintu bidibu nabi ne bayende bimpe, ubivudija kabidi.

¹²Kena umuenzela bibi nansha musangu umue. Kadi udi umusankisha matuku ende onsu.

¹³Udi ukeba miosa ya mikoku ne buanda bua ndanda, ukuata nabi mudimu ne disuminyina.

¹⁴Mmufuanangane ne majuwa adi ambula biakudia. Udi ukeba biakudia kule, ubifikisha ku mbelu.

¹⁵Udi ujuka patshiatshia, ulambila bena mu nzubu muende tshiakudia, wabanyina bakaji bena mudimu midimu ya kuenzabu.

¹⁶Yeye mumane kuela meji bimpe, udi usumba budimi, ukunamu mionji ya mvinyo ku makuta avuaye mupete.

¹⁷Udi ukuata mudimu muende muonsu, kayi upungila to.

¹⁸Udi ukenketa midimu yende yonsu, bua itungunuke amu bimpe. Udi wenza mudimu ne bufuku, mutemeshe muendu.

¹⁹Bianza biende kabiena bikisha. Udi uluka buanda, utela bilamba.

²⁰Udi wambuluisha bena dikenga, upa bapele ne muoyi wa kalolu.

²¹Kena utshina mashika bua bena mu nzubu muende. Muntu yonsu udi mu nzubu muende udi ne bivualu bikumbane.

²²Udi ukuma biata bia kuteka panshi, uvuala bilamba bimpe bia buanda bua ndanda bukunzubile.

²³Bayende udi mumanyike bikole mu tshimenga. Udi usomba mu bisangilu munkatshi mua bakulu ba mu tshimenga.

²⁴Udi ukuma bilamba, ubipana, upanyisha bangenda mushinga mikaba ya mu tshimonu.

²⁵Bukole ne buneme ke biende bilengejilu. Udi utua mimuemue, padiye wela meji ku matuku atshidi kumpala.

²⁶Udi wakula ne meji. Udi mumanye mua kubelangana ne muoyi muimpe.

²⁷Udi utangila bionsu bidi bipitakanangana mu nzubu muende. Kena musue kushala kayi ukuata mudimu to.

²⁸Bana bende badi balua kumuela ka lumbandi. Bayende udi umutua makumbu wamba ne:

²⁹“Bakaji ba bungi mba tshitembu! Kadi wewe udi mubapite bonsu.”

³⁰Bulenga bua mpala budi bushima, buimpe bua kuisu budi bujika. Amu mukaji udi witaba Maweja-Nangila ke utudi mua kutua makumbu.

³¹Numuanyishe bua bionsu bidiye wenza, bena tshimenga bonsu bamutumbishe bua mudimu udiye ukuata.