Read Tshiluba Nsumuinu 6 Bible Online

Nsumuinu 6 - Tshiluba bible

Nsumuinu 6

¹Muananyi, udi mudieyeke bua dibanza dia mulunda webe anyi? Udi mulaye patoke bua kumuambuluisha[18] anyi?

²Udi mulaye bua kukumbaja biuvua muambe anyi? Malaya ebe adi akukuata anyi?

³Diba adi udi ku bumfumu bua muntu uuvua musombeshangane nende lupetu. Nanku, bua wewe kupatuka mu bualu ebu: uye kumonangana nende, umusengelele, umulombe bikole bua akupatule mu bualu ebu.

⁴Kuikisha nansha kakese, kuladi to, amu wewe mumane kupatuka mu tshilumbu atshi.

⁵Utuke mudi kabuluku kabafuka mu buteyi, nansha mudi nyunyi utuka ku budimbu.[19]

⁶Wewe muena lulengu, uye kumona musuasua.[20] Ubatamine bibidilu biawu, upeteleku meji.

⁷Musuasua kawena ne udi uutangila, kawena ne muuludiki, nansha ne mukalenga wa mudimu.

⁸Kadi udi ukungija biakudia mu tshikondu tshia mvula. Mu tshikondu tshia dinowa udi usangisha bintu mu diyeba.

⁹Kadi wewe muena lulengu neulale tulu too ne ku diba kaayi? Neubike ku tulu diba kaayi?

¹⁰Paudi wanji kulala kakese, ubungila tshitupa, ushala mudiolole, maboku mavungila pa tshiadi,

¹¹bupele budi bukukuata tshimpitshimpi bu muivi. Ke padi dikenga difika kuudi bu mupawudi wa nzubu ya bende.[21]

¹²Muntu udi ne biakulakula mukana muende, mmuntu tshianana, mmuenzavi.

¹³Udi upodia, ufiita makasa panshi, utapangana kazadi mu tshianza, bua amone mua kushima bakuabu.

¹⁴Udi amu umvua nzala ya kuenzelangana bibi. Udi ulongolola malu mabi a kuenza kayi upungila. Udi ujuula matandu.

¹⁵Nanku neabutuke diakamue, neafue kakuyi mushindu udiye mua kupanda.

¹⁶Kudi malu asambombu adi Maweja-Nangila ubenga, adiye udiwula kashidi:

¹⁷mesu a ditambisha, ludimi lua muena dishima, bianza bidi bishipa bantu badi kabayi ne tshilumbu,

¹⁸lungenyi ludibu bakeba kuenza nalu malu mabi, makasa adi aya ku dienza dia malu mabi,

¹⁹muntu udi ujadika malu a dishima. Kadi kudi kabidi bualu bua muanda mutekete: ke muntu udi usongakaja bena muntu.

²⁰Muananyi, vuluka malu adi tatuebe mukuambile. Londa mibelu ya kudi mamuebe.

²¹Ubivuluke matuku onsu mu muoyi webe. Ubilame bimpe, bu masanga a mushinga mukole, adibu bela mu nshingu.

²²Neakuambuluishe kuudi uya, ne kuudi ufuma. Nebikukube mu tulu. Paudi ubika ku tulu nebikuambile tshia wewe kuenza.

²³Bualu bidi baledi bakuambila bidi bu muendu. Mibelu yabu idi bu butoke. Malongesha abu adi atuludika mu njila wa muoyi.

²⁴Bionsu ebi nebikuepule kudi mukaji muenzayi, ne ku miaku ya lubombu ya mukaji wa bende.[22]

²⁵Kualakanyi buimpe bua mukaji wa bende. Mesu adiye ukulenguila, kaakulobeshi.

²⁶Mukaji muena tshiendenda, badi bamufuta amu tshiakudia tshikese. Kadi bua mukaji wa bende, muntu neajimije bionsu bidiye nabi.

²⁷Badi mua kuambuila dikala dia kapia mu tshibombu, tshilamba tshionsu katshiyi tshipia anyi?

²⁸Badi mua kuendela pa makala a kapia, makasa kaayi apia anyi?

²⁹Ke mudi muntu, udi ubuelela mukaji wa bende mu nzubu, upia tshibawu.

³⁰Bantu kabena badiwula muivi, padiye muibe bua kutuyisha nzala idiye nayi.

³¹Kadi padibu bamukuata, udi ufuta bintu bipite bungi bua biwaye muibe. Neajimije bintu biende bionsu.

³²Muntu udi wambisha mukaji, mmubule lungenyi. Udi udikebela yeye nkayende kabutu.

³³Nebamutuute, bamudiwula kabidi. Neashale ne bundu kashidi.

³⁴Bualu bayende wa mukaji neikale ne tshiji ne mukawu wa bungi. Dituku dikuabu neasombuele mulume awu kayi ne luse.

³⁵Kuakuanyisha bua bamufute tshibawu to. Kakushala ne lutulu nansha bobu bamupesha bintu bipite bungi bua kutalaja tshiji tshidiye natshi.