Read Tshiluba Nsumuinu 7 Bible Online

Nsumuinu 7 - Tshiluba bible

Nsumuinu 7

¹Muananyi, vuluka miaku yanyi, kupu muoyi bimvua mukuambile.

²Enza mundi nkuambila, nanku neulale matuku mavule panu. Lama bimpe dilongesha dianyi bu muudi ulama kamonyi ka disu diebe.

³Enda nadi miaba yonsu bu kakanu ka ku munu, udifunde mu muoyi webe.

⁴Unemeke meji bikole bu muudi unemeka muanenu wa bakaji menemene. Ambila lungenyi ne: wewe udi mulunda wanyi wa pa muoyi.

⁵Nebikuepule kudi mukaji muena buendenda, ne ku miaku ya lubombu ya mukaji wa bende.

⁶Dituku dikuabu, mvua musombele ku dididishi dia ku nzubu kuanyi. Mvua mutangile pambelu.

⁷Meme kumona munkatshi mua bansongalume badi kabayi bamanye malu, nsongalume mukuabu mubule meji bikole.

⁸Uvua upitshila mu musesu pabuipi ne muaba uvua munga mukaji usomba. Kuyaye mutangile ku nzubu wa mukaji awu.

⁹Bivua ku dilolu, pamue ne diba kubuela, bua kuisu kufiika.

¹⁰Ke mukaji awu kuvua kumuakidila, muvuale bu mukaji muena buendenda, budimu munda tente.

¹¹Mukaji wa dikamakama ne disalu awu kavua unengakana nkayende mu nzubu to.

¹²Uvua udileja miaba yonsu: mu njila, mu bisalu, wimana mu mansanga a njila, ulubakana ne malu.

¹³Nanku kuimanyikaye nsongalume bua kuyukila nende. Kumuelaye mu tshitupa, umutangila ne mesu malengula, wamba ne:

¹⁴“Mvua mulaye Mvidi Mukulu milambu ya kumuela tuasakidila. Ndi mumulambulayi lelu.[23]

¹⁵Ke pandi mupatuke bua kusambakena nebe. Mvua nkukeba. Mbakupetshi.

¹⁶Nkadi muakaje bulalu buanyi ne mbulankete ya bilamba bia makalumakalu, ne bilamba bia buanda bua ndanda bia mu Ejipitu.

¹⁷Pa bulalu buanyi, ndi mumiaminepu manananshi a mishindu mishilangane: a mire, a alowe ne a kanele.

¹⁸Fika, tulejangane mutudi banangangane ne mudibu butshia. Tusankishe mibidi yetu ne dinanga.

¹⁹Bayanyi kena ku nzubu to. Mmuye ku luendu lua mutantshi mule.

²⁰Mmuye ne makuta a bungi. Nealukile ku nzubu kunyima kua mbingu ibidi, patua ngondu ku tshibanda.”

²¹Kumusuminyinaye bikole ne budimu buende. Kumutekeshaye ku muoyi ne miaku misheme.

²²Mpindiewu, nsongalume kumulonda bu ngombe, udibu baye nende ku tshishipelu. Mupale awu kudikebela tshibawu, kupia mu buteyi.

²³Mukete kumutua kumutubula mutshima.[24] Udi bu nyunyi udiela mu nsumba, kayi umanya muaba udi lufu lumuindila.

²⁴Bana banyi, ntelejayi mpindiewu! Umvuayi mundi ngamba.

²⁵Kanuteki muoyi wenu kudi mukaji wa nenku; kanulekedi njila milenga.

²⁶Bualu mukaji wa nenku mmubutule bantu ba bungi. Nansha bavua badiamba ne: tuetu tudi ne muoyi mukole, mbapone mu mateyi ende.

²⁷Kuya ku nzubu kua mukaji wa nenku nkubuela muaba wa lufu, nkupueka mu lupongu ludi luyamu.