Read Tshiluba Nsumuinu 8 Bible Online

Nsumuinu 8 - Tshiluba bible

Nsumuinu 8

¹Kanuena bumvua anyi? Meji[25] adi ela lubila. Lungenyi ludi luela diyi dikole.

²Meji adi mimane ku nsongu ya mikuna idi pabuipi ne njila, ne mu mansanga a njila.

³Miaba yonsu idi bantu bapitshila mu tshimenga, nangananga ku biibi bia tshimenga, Meji adi ela lubila ne:

⁴“Bantuee! Nuenu ke bandi mbikila. Ndi mbikila bantu bonsu.

⁵Nuenu batshidi batshimbakane, longayi munudi mua kupeta meji. Nuenu bapote, ikalayi ne lungenyi.

⁶Telejayi: bindi nnuambila, bidi ne mushinga. Ndi nnuleja malu onsu patoke.

⁷Bushuwa, ndi ngamba malu amu malelela. Mayuki a dishima mmambipila.

⁸Ndi ngamba malu anu mudiwu, tshiena nshima, tshiena ndinga bantu to.

⁹Muena lungenyi udi umvua bindi ngamba. Bavua balonga malu badi babangulula bimpe.

¹⁰Kebayi mua kumvua dilongesha dianyi, pa mutu pa kukeba tshiamu tshitoke tshia mushinga mukole. Nusungule lungenyi bu tshintu tshipite mpawungi.

¹¹Bualu meme, Meji, ndi mupite mabue a busanga ku mushinga. Bintu bia mushinga mukole, kabiena ne mushinga bu wanyi meme to.[26]

¹²“Meme ndi Meji. Budimu ke bundi ngenda nabu. Ndi mumanye mua kujingulula malu.

¹³Kutshina Maweja-Nangila ke kudiwula bubi. Meme ndi ndiwula ditambisha ne budiambi, ngenzelu mibi, ne miaku ya dishima.

¹⁴Mudimu wanyi nkubela ne kudimujangana. Ndi lungenyi mene. Meme ke udi upeshangana bukole.

¹⁵Meme ndi ngambuluisha bakalenga bua bikale mu bumfumu, ne balombodi ba ditunga bua bele mikenji mimpe.

¹⁶Ndi ngambuluisha bamfumu bua baludike matunga, balombodi ne bandumbulula bua bakuate mudimu bimpe.[27]

¹⁷Ndi munange badi bannanga. Badi bankebelamu nebampete.

¹⁸Ndi mpeteshangana bubanji, lumu, biuma bidi bishala kashidi, ne diakalenga dilelela.

¹⁹Mapa anyi mmapite mpawungi muimpe ku mushinga. Lupetu luawu ndupite tshiamu tshitoke tshia mushinga mukole.

²⁰Badi bansangana mu njila udibu balonda kudi bantu badi bakeba Mvidi Mukulu, mu njila idi bantu benzelangana bimpe.

²¹Ke muaba undi mpetesha badi bannanga bintu. Ndi nguwuje nzubu yabu ne mpetu tente.

²²Maweja-Nangila wakadianza kumfuka[28] ku kale, kumpala kua bintu bikuabu bionsu.

²³Uvua mungenze ku tshibangidilu tshia bidimu, kayi muanji kufuka buloba.

²⁴Bavua bandele, kakuyi mayi manene malabale, kakuyi mpokolu idi ipatula mayi.

²⁵Bavua bandele, kabayi banji kuimanyika mikuna minene ne mikese.

²⁶Maweja-Nangila kawa nansha muanji kufuka buloba, madimi, nansha lusenga.[29]

²⁷Meme nkavuaku tshikondu tshivuaye mushindamije diulu, muase tshibuashibuashi kulu kua mayi manene malabale a ku tshibangidilu.

²⁸Uvua muteke mavuba mulu, uvua mupatule mpokolu ya mayi adi munda mua buloba.

²⁹Uvua muenzele mayi manene mikalu yawu, bua kaasambuki pa buloba buume. Uvua mushindike buloba bikole panshi.

³⁰Tshikondu atshi, mvua pabuipi nende bua kumuambuluisha ku midimu yende ne ngenyi yanyi. Dituku dionsu pavuaye ummona, uvua ne disanka. Mvua nnaya amu ne disanka, yeye muntangile,

³¹pa buloba buvuaye mufuke. Biangatshile ku tshikondu atshi, disanka dianyi didi amu dia kumonangana ne bantu.

³²“Kadi mpindiewu, bana banyi, ntelejayi. Panuikala nulonda mibelu yanyi, nenupete diakalenga.

³³Telejayi malongesha anyi, nukuate nawu mudimu, nanku nenupete meji.

³⁴Bantu badi banteleja, badi bimana dituku dionsu ku tshiibi tshianyi, batshishila ku nzubu kuanyi, mbena diakalenga.

³⁵Udi unsangana meme, mmupete muoyi, Maweja-Nangila neamuele lupemba.

³⁶Kadi muntu udi ungenzela malu mabi, udi udienzela bibi yeye nkayende. Udi unkina, mmunange lufu.”