Read Tshiluba Muambi 1 Bible Online

Muambi 1 - Tshiluba bible

Muambi 1

¹Telejayi miaku ya Muambi, muana wa Davide, uvua kabidi mukalenga mu Yerushalayime.[1]

²Muambi udi wamba ne: malu onsu adi tshianana menemene. Malu onsu adi apita patupu. Kaena ne mushinga.

³Bantu badi batata bikole pa buloba bua kuenza mudimu. Kadi tshidibu bapeta ntshinyi?

⁴Bantu badi balelangana, bafua. Badibu balela bafua kabidi. Kadi buloba budi bushala kashidi amu muvuabu.

⁵Diba didi dipatuka, dibuela. Pashishe didi dipingana muaba udidi ne bua kupatukila kabidi.

⁶Lupepele ludi lututa lutua eku, lutua kuaka. Ludi lututa, lunyunguluka, pashishe lubangulula tshiakabidi.

⁷Mayi a misulu yonsu adi apueka, adiela mu mayi manene. Kadi mayi manene katshia kaena muwule to. Nansha nanku, mayi a misulu adi adiela amu kudiela mu mayi manene.

⁸Mesu kaena apungila mua kumona, matshi kaena apungila mua kumvua. Muntu kena mua kumvuija mudi bia panu bionsu bitonda.[2]

⁹Bivua bienzeka nebienzeke kabidi. Bivua bantu benze nebabienze kabidi. Kakuena bualu bupiabupia pa buloba apa to.

¹⁰Padi bualu buenzeka, tudi mua kuamba ne: “Tangilayi bualu bupiabupia!” Kadi bualu bua nanku buvua bumane kuenzeka kalekale kabayi banji kutulela.

¹¹Kadi tudi tupua muoyi bivua bienzekela bankambua betu. Nenku bitudi tuenza mpindiewu, nansha bidi ndelanganyi yetu ne bua kuenza maloba, nebabipue muoyi kabidi amu lukasa.

¹²Meme, Muambi, mvua mukalenga wa bena Izrayele, musombele mu Yerushalayime.

¹³Meme kukenketa ne muoyi wanyi mujima, malu adi enza mu bantu, bua mmone mua kuajingulula. Kadi ebi bidi amu mudimu wa lutatu udi Mvidi Mukulu wenzeja bantu!

¹⁴Meme kumona bionsu bidi bienzeka pa buloba. Bionsu ebi bidi patupu, bidi amu bu kuipatangana ne lupepele.

¹⁵Bualu tshidi tshinyongoboke, kabena mua kutshilulamija. Bintu bidi kabiyiku, kabena mua kutabala.

¹⁶Mvua muele meji ne: ndi mupete meji a bungi mupite bonsu bavua bandianjidila mu bukalenga mu Yerushalayime. Ndi mumanye malu a bungi, nansha amvua mulonge, nansha amvua mumvue ne anyi abidi.

¹⁷Mvua nkeba mua kujingulula mudi malu mashilangane ne butatakane, mudi lungenyi lushilangane ne bupote. Kadi meme kumona ne: bionsu bindi ngenza bidi amu bu kuipatangana ne lupepele.

¹⁸Muntu udi ne meji a bungi, udi upeta kabidi ntatu mipite. Muntu udi wenda ulonga malu, makenga ende adi enda avulangana.