Read Tshiluba Muambi 11 Bible Online

Muambi 11 - Tshiluba bible

Muambi 11

¹Ela biudi nabi mu mayi manene. Bumue dituku dikuabu neubipete tshiakabidi.[49]

²Teka mpetu yebe miaba mishilangane, bualu kuena mumanye diakabi didi mua kukukuata pa buloba.

³Kudi mutshi mukubikile ke kudiwu ushadila. Padi mavuba muwule ne mayi, mvula udi uloka.

⁴Muntu udi utshina lupepele ne mvula, kena ukuna nansha unowa bia pa madimi.

⁵Kuena mumanye mudi muana ukola munda mua mamuende. Nenku kuena mua kumanya mudi Mvidi Mukulu ukuata mudimu, bualu yeye ke udi wenza bionsu.

⁶Ke paudi mua kukuna dinda too ne dilolu kuyi wikisha. Bualu kuena mumanye kuwapetela tshintu, nansha ku mudimu wa dinda nansha wa dilolu, nansha ku yonsu ibidi.

⁷Butoke bua diba budi bulenga, busankisha muntu udi ubumona.

⁸Muntu udi ne bua kusanka bua tshidimu tshionsu tshidiye ne muoyi, nansha yeye mushale panu bidimu bi-vule. Kadi tuvulukayi se: matuku a miidima neikale a bungi. Kadi bionsu biavua kuenzeka bidi amu tshianana.

⁹Wewe nsonga, Sankaku mu bunsonga buebe. Ikala ne disanka pautshidi ne bukole. Bionsu biudi ujinga, bionsu bidi bikulengelela ubikumbaje. Kadi umanye ne: Mvidi Mukulu neakulumbuluishe pa bionsu biudi wenza.

¹⁰Umbusha mu muoyi webe malu onsu adi akubungamija, kabidi mu mubidi webe bionsu bidi bikusankisha. Bualu bunsonga ne bukole bidi bijimina lukasa.