Read Tshiluba Muambi 12 Bible Online

Muambi 12 - Tshiluba bible

Muambi 12

¹Vuluka mufuki webe[50] mu matuku a bunsonga buebe. Umuvuluke, matuku a dikenga kaayi manji kufika. Tshikondu tshikuabu newambe ne: “Bia panu bionsu bidi bintonda.”

²Diba adi, newikale mu miidima. Diba, ngondu ne mitotu kabiakukukenkela kabidi to. Nansha mvula mumane kujika, mavuba makuabu adi amu afiikisha tshibuashibuashi.[51]

³Diba adi, maboku avua akuambuluisha neazakale. Mikolu iuvua wenda nayi neitekete. Menu neashale makese, kuyi mua kutshiakunya biakudia kabidi bimpe. Mesu ebe neikale bu mpofu.

⁴Matshi ebe kaakumvua kabidi mutoyi wa mu njila, nansha muadi wa tshiamu tshidi tshipelesha bukula, nansha muadi wa nyunyi,[52] nansha misambu idi bantu bimba.

⁵Wewe neutshine mua kubanda pa kakuna. Newende utetuka, mufuane kudishinda panshi. Nsuki yebe neitoke. Neufuane mutshi udi ne bilongu bitoke. Uvua utupika bu mpasu, mpindiewu ukadi ukalaba panshi. Kuakumvua kabidi nzala, nansha wewe muele ndungu mivule mu biakudia! Dituku dikuabu nebaye kukujika ku nzubu webe wa kashidi. Badidi ba miadi ya madilu benda badila mu misesu, bualu badi bindila diba adi.

⁶Nshinga wa tshiamu tshitoke tshia mushinga mukole udi utuka, dikopu dia mpawungi didi difua, ne dibungu dia mayi didi ditayika ku mpokolu, nkata musunsuke wa ku tshiina tshia mayi udi upona mu tshiina.

⁷Diba adi, mubidi wa muntu neupingane mu buloba muvuawu mufume. Mueyelu wa muoyi neupingane kudi Mvidi Mukulu uvua mumupeshawu.

⁸Muambi udi wamba ne: Malu onsu adi tshianana, adi patupu, kaayi atupetesha tshintu.

⁹Muambi uvua ulongesha bantu bivuaye mumanye, kayi upungila. Uvua mufunde nsumuinu ya bungi yeye mumane kujadika bulenga buayi.

¹⁰Muambi nansha yeye mufunde malu mudiwu, uvua muenze muende muonsu bua kupeta miaku ya kukolesha nayi bantu ku muoyi.

¹¹Bualu miaku ya bantu ba meji idi bu misongolu idi balami baludika nayi mikoku, idi bu ndami idi isuikakaja malu adi muntu mumanye. Miaku eyi mmifume kudi Mvidi Mukulu. Yeye udi mulami umuepele buetu bonsu.[53]

¹²Muananyi, katuena ne bua kusakidila bia bungi. Mikanda itudi mua kufunda kayena ne ndekelu. Muntu udi ulonga, udi upungila bikole.

¹³Kadi nkomenu wa malu onsu atuvua bafunde udi nunku: Muntu yonsu udi ne bua kunemeka Mvidi Mukulu, kutumikila meyi ende.

¹⁴Bualu Mvidi Mukulu nealumbuluishe muntu yonsu pa malu ende onsu, nansha mempe nansha mabi, nansha masokome mene.