Read Tshiluba Muambi 2 Bible Online

Muambi 2 - Tshiluba bible

Muambi 2

¹Meme kudiambila ne: “Tukebe masanka a mu bantu. Tumone mudi diakalenga.” Kadi bionsu ebi bidi amu patupu.

²Tuseku tudi matshimbu. Disanka kadiena ditupetesha tshintu.

³Mvua mukebe masanka pa kunua maluvu, mvua muidikije bidi bantu bapote benza. Kadi meji avua ashala ne bumfumu mu muoyi wanyi. Mvua musue kujingulula ne: bantu badi mua kupeta diakalenga mene matuku adibu basomba panu anyi?

⁴Meme kuenza midimu, kudiashila nzubu ya bungi, kukuna mionji ya mvinyo.

⁵Meme kudienzela mpangu, kukunamu mitshi ya bimuma ya mishindu yonsu.

⁶Mvua mumbule biina bia mayi bua mmone mua kumiamina mitshi itshidi mitekete mayi.

⁷Meme kusumba bapika balume ne bakaji, kusakidila ku bimvua mumane kuikala nabi. Mvua ne ngombe ne mikoku mivule, bipite bia bonsu bavua bandianjidile mu Yerushalayime.

⁸Meme kunguja tshiamu tshitoke tshia mushinga mukole ne mpawungi, ne bintu bia mushinga mukole bivua bifumine kudi bakalenga ne kudi balombodi ba maloba, bavua ku bumfumu buanyi. Mvua ne bena misambu balume ne bakaji, bavua bangimbila bua kunsankisha. Mvua musele bakaji[3] bavule, bungi budi muntu mua kujinga.

⁹Mvua mupete lumu lunene lupite lua bonsu bavua bandianjidile mu Yerushalayime.[4] Kadi matuku onsu aa tshivua mujimije meji amvua nawu to.

¹⁰Bionsu bimvua njinga mvua amu mbipeta. Tshivua mupange disanka nansha dimue. Eyowa, mvua mupete bintu bivule ku midimu yonsu imvua mukuate. Midimu yonsu imvua muenze ivua amu minsankishe.

¹¹Kadi diba adi mvua mutangile midimu yanyi yonsu ne ntatu imvua mupete pa kuyikuata. Nanku meme kumona ne: bionsu bidi patupu, bidi amu bu kuipatangana tshianana ne lupepele. Kakuena bua nsongu budi bantu bapeta panu to.[5]

¹²Mvua musue kujingulula ne: muntu wa meji udi mupite muntu mupale, nansha mutshimbakane ku tshinyi? Meme kudikonka kabidi ne: muntu wampingana mu bukalenga neenze malu mashilangane ne avuabu benze kudi bavua bamudianjidile[6] mu bukalenga anyi?

¹³Bushuwa ndi mumanye ne: meji mmapite bupote, mudi butoke bupite miidima.

¹⁴Bualu muntu wa meji udi mumanye kudiye uya. Kadi mupote udi wenda ububuta. Kadi ndi mumanye kabidi ne: bonsu babidi badi ne nshikidilu wa momumue.

¹⁵Pandi meme ne nshikidilu wa momumue ne wa mupote, meji andi mumupite nawu adi angambuluishe ku tshinyi? Nanku meme kumona ne: ebi bionsu bidi tshianana.

¹⁶Bionsu bidi bienzeka, badi babipua muoyi lukasa. Muntu wa meji udi ufua, anu mudi mupote ufua. Kadi bonsu babidi nebabapue muoyi. Bionsu ebi bidi bienzeka nanku bua tshinyi?

¹⁷Nanku bia panu bivua bintonde. Ke meme kudiwula malu onsu adi bantu benza muinshi mua diba, bualu adi a tshianana, adi bu kuipatangana ne lupepele.

¹⁸Mvua mudiwule mudimu ne lutatu bimvua nabi panu. Bualu bionsu bindi mupete ndi ne bua kubishila udi umpingana.

¹⁹Yeye neakuate mudimu bu muena meji, nansha bu mupote anyi? Udi mua kuandamuna lukonku alu nnganyi? Kadi neapete bintu bionsu bimvua musangishe panu ku mudimu umvua mukuate ne ku meji amvua nawu. Bionsu ebi kabiena biumvuika to!

²⁰Nenku meme kutuadija kunyingalala bikole bua bungi bua midimu imvua mukuate panu.

²¹Muntu udi ukuata mudimu ne meji, kabidi ne lungenyi, upeta tshipeta tshimpe, kadi tudi tumumona ushiya bintu biende abi kudi uvua kayi mubienzele mudimu bua kubipeta. Ebi kabiena biumvuika to, kabiena bimpe nansha.

²²Nenku tshidi muntu mua kupeta ku mudimu udiye ukuata ne lutatu, muinshi mua diba ntshinyi?

²³Midimu yende idi imupetesha amu dikenga ne kanyinganyinga buatshia buatshia. Nansha butuku, lungenyi luende kaluena ne dikisha[7] to. Bushuwa, ebi bionsu kabiena biumvuika nansha!

²⁴Diakalenga dia bantu didi amu kudia, kunua ne kusanka ne bidibu bapeta ku mudimu wabu.[8] Ndi mujadike ne: Mvidi Mukulu ke udi ubapesha diakalenga edi.

²⁵Bualu muntu kena mua kudia, nansha kusanka, padi Mvidi Mukulu kayi muanyishe.[9]

²⁶Nanku Mvidi Mukulu udi upesha muntu udi mumutokela ku muoyi, meji, dimanya ne disanka. Kadi muntu udi umubipila udi umupesha mudimu wa kukungijila udi mumutokela[10] ku muoyi mpetu. Kadi ebi kabidi bidi amu tshianana, bu kuipatangana ne lupepele.