Read Tshiluba Muambi 5 Bible Online

Muambi 5 - Tshiluba bible

Muambi 5

¹Kuambi bualu, kuyi muanji kuela meji. Kulayi Mvidi Mukulu malaya ebe lukasa lukasa. Mvidi Mukulu udi mu diulu, wewe udi pa buloba. Nanku miaku iudi wamba ikale mikese.

²Bualu muntu udi upita kuakula, udi upita kuakula miaku mibi. Ke mudi muntu udi ne ntatu mivule upita kulota ndota mibi.[19]

³Paudi ulaya Mvidi Mukulu bualu, ubukumbajilamu lukasa. Bualu Mvidi Mukulu kena munange bantu batshimbakane to. Nanku kumbaja tshiudi ulaya.

⁴Mbimpe kubenga kulaya, pa mutu pa kulaya, kuyi ukumbajilamu tshiudi ulaya.

⁵Lekela kuakula miaku idi ikubipisha. Wewe muambe miaku mibi, newikale ne tshilumbu tshia kuambila mutuangaji ne: “Mvua mutupakane.” Nanku Mvidi Mukulu neakufikile munda bua miaku yebe mibi ayi. Ne anyange midimu yebe.

⁶Miaku ya bungi kayena ikumbaja bualu, mudi bilota bivule[20] kabiyi bileja bualu. Nanku enza anu muebe muonsu bua unemeke Mvidi Mukulu.

⁷Kukemi bua paudi mumone bakengesha bapele mu ditunga, kabayi bakosa nsambu yabu pa yoyi. Bualu muntu udi ne muanzu munene, kakupeta tshilumbu, bualu badi bamulame kudi munga udi ne muanzu munene mupite. Bobu babidi kabidi kabakupeta tshilumbu, bualu badi babalame kudi banga badi babapite ku muanzu.

⁸Bivua mua kuikala bilenga bipite, kupeta mukalenga wa ditunga udi wambuluisha batshidime.[21]

⁹Muntu udi munange biuma, katshia kena muanyishe bidiye mumane kupeta to. Udi musue kunema, kakupeta bionsu bidiye ujinga to. Ebi kabidi kabiena ne bua nsongu nansha.

¹⁰Padi muntu ne biuma bivule, bantu bavule badi babidia. Biuma nebilengelele muenabi ku tshinyi? Bushuwa udi mua kubitangila ne mesu, kadi tshikuabu tshidiye upeta ntshinyi?

¹¹Muntu udi ukuata mudimu, nansha yeye mudie bikese nansha bia bungi udi ulala amu bimpe. Kadi biuma bivule bia mubanji bidi bimunyangila tulu.

¹²Kudi bualu bubi bupite bundi mmona panu apa: ke mubanji udi uteka lupetu luende ku luseke, kadi ubuela amu mu dikenga.

¹³Udi ujimija lupetu elu mu bualu bubi. Muana udiye ulela kena mua kupiana tshintu.

¹⁴Amu muvuabu bamulele butaka kudi mamuende, ke mudiye ushiya buloba kayi ne kantu. Nansha yeye mukuate mudimu bikole, kena upeta tshintu, kena mua kuya ne kantu.

¹⁵Ndiakabi kaayi edi! Udi umuka pa buloba, amu muvuaye mufikepu! Mmuenze mudimu bua kupeta tshinyi? Amu lupepele![22]

¹⁶Kabidi matuku ende onsu panu uvua usomba amu ne kanyinganyinga,[23] ne tshiji ne makenga.

¹⁷Nanku tshindi mumanya tshidi nunku: diakalenga dia muntu ke kudia, ne kusanka ne bidiye upeta ku midimu yende matuku onsu adiye ne muoyi pa buloba. Ke mudimu udi Mvidi Mukulu utufundila panu!

¹⁸Misangu mikuabu Mvidi Mukulu udi upesha muntu biuma, umupesha kabidi ne diba dia mua kusanka nabi. Nanku muntu ewu ela amu Mvidi Mukulu tuasakidila bua padiye usanka ne bidiye mupete ku mudimu wende. Bualu bionsu abi ndipa dia kudi Mvidi Mukulu.

¹⁹Bu mudi muntu ewu upeta disanka kudi Mvidi Mukulu, kena uvuluka mudi matuku ende a panu makese be!