Read Tshiluba Muambi 7 Bible Online

Muambi 7 - Tshiluba bible

Muambi 7

¹Lumu luimpe ndupite manananshi a mushinga mukole.[25] Dituku dia lufu lua muntu ndipite dituku di wabu bamulele.

²Mbimpe kubuela mu nzubu wa madilu pa mutu pa kubuela muaba udi bantu badia bondoloka. Bualu lufu nnshikidilu wa muntu yonsu. Nanku bidi bilenga bua muntu yonsu amanye, kabidi avuluke bualu ebu.

³Kudila nkupite kuseka. Muntu udi ubungama, unyenga mpala, kadi muoyi wende udi ulonga malu.

⁴Muntu wa meji udi uya muaba udi bantu babungama, muntu mutatakane udi uya muaba udi bantu basanka.

⁵Mbimpe kuteleja muntu wa meji udi ukudiwula pa mutu ka kuteleja muntu mupote udi ukutua makumbu.

⁶Bualu, bu mudi lukunyi tua meba tutudika muinshi mua luesu pa kapia, ke mudi tuseku tua mutshimbakane katuyi ne tshiditu tuenza.

⁷Padi muena meji ukengesha muntu, udi wenza amu bu muntu mupale. Mabuejila adi mua kumunyanga muoyi.

⁸Bidi bimpe kukosesha mutoyi, pa mutu pa kubangulula. Bidi bimpe kuikala muena lutulu, pa mutu pa kuikala muena ditambisha.

⁹Kufiki munda lukasa, bualu tshiji mmudimu wa bantu bapote.

¹⁰Katudikonki ne: “Bikondu bia kale mbimpe bipite bia lelu bua tshinyi?” Lukonku lua nanku ludi luleja muudi kuyi muanji kupeta meji.

¹¹Meji adi malenga mapite bintu bia bumpianyi. Adi alengelela bantu bonsu badi basomba panu.[26]

¹²Adi asombesha bantu ne ditalala bu mudi lupetu luenza. Badi nawu nebasombe matuku mavule panu. Ke patudi ne tshilumbu tshia kuamanya.[27]

¹³Tutangile mudi Mvidi Mukulu muenze. Muntu nansha umue kena mua kululamija tshidi Mvidi Mukulu mukonyangaje.

¹⁴Dituku dia disanka, usanke. Dituku dia dikenga, wela meji bimpe. Mvidi Mukulu udi utuma dikenga nansha disanka bua muntu kamanyi malu atshidi kumpala kuende.[28]

¹⁵Ntshidi amu matuku makese panu. Mvua mumone ne bionsu bidi mua kuenzeka. Muntu udi mua kufua, nansha yeye muntu udi wenza tshidi Mvidi Mukulu musue. Muntu mubi udi mua kushala ne muoyi, nansha yeye muena buenzayi.

¹⁶Nanku katupitshishi ne dikeba dia buakane, katupitshishi ne dikeba dia meji. Tshianana tudi mua ku-dibutula[29] tuetu nkayetu.

¹⁷Kadi kulondi amu njila wa bubi, nansha wa bantu bapale. Tshianana udi mua kufua, diba diebe kadiyi dianji kukumbana.

¹⁸Mbimpe kulonda mibelu yonsu ibidi eyi, bualu muntu udi unemeka Mvidi Mukulu kena ne bua kukolesha malu bikole.

¹⁹Meji adi aludika bilenga udi nawu, bipite mudi balombodi dikumi mua kuludika tshimenga tshimue.

²⁰Mulengele kabula kalema, udi ne kende kamulamata.[30]

²¹Kuteleji bionsu bidi bantu bamba, bualu udi mua kumvua mudi muena mudimu webe ukujana.

²²Bualu tudi bamanye ne: tuetu kabidi tudi tujana bantu bakuabu misangu mivule.

²³Mvua mukenkete malu onsu. Meme kuamba ne: “Ndi musue kuikala muntu wa meji.” Kadi tshiena mukumbaje bualu ebu to.

²⁴Malu a panu adi mapite bungi, kabidi makole! Waatandula nnganyi?

²⁵Nenku meme kutuadija kulonga malu, meme kukeba mua kujingulula bidi panu. Mvua musue kujingulula tshidibu babikila meji. Mvua mukebe bua bandamune ku nkonku imvua nayi pa malu onsu adi enzeka! Meme kumona ne: kuikala muntu mubi, nansha mupote, mbupale.

²⁶Ndi mumone ne: mukaji udi uteya bantu mmupite lufu ku bululu. Dinanga diende didi bu bukondu. Maboku ende adi akusuika bu nkanu. Muntu udi wenza tshidi Mvidi Mukulu musue, udi upanduka kudi mukaji ewu. Kadi muenji wa bibi nebamukuate kudi mukaji ewu.[31]

²⁷Muambi udi wamba ne: Ndi mutangile malu onsu adi panu bua kuajingulula.[32] Kadi tshiena mutandula onsu to. Ku bantu tshinunu, ndi musangane muntu muimpe anu umue, kadi ku bakaji bapite bungi, tshivua musangane mukaji wa nsongu nansha umue to!

²⁹Tshintu tshimue tshindi mumanye ntshietshi: Mvidi Mukulu uvua mufuke muntu muakanangane ku bionsu. Kadi muntu ewu kudibuejakaja mu malu a bungi.