Read Tshiluba Muambi 8 Bible Online

Muambi 8 - Tshiluba bible

Muambi 8

¹Muntu nansha umue kena muena meji wa menemene. Udi mua kumvuija bidi bienzeka nnganyi? Kadi muntu wa meji udi uleja mpala wa disanka, minyengu ijimina.[33]

²Padi mukalenga wakula, bidi bimpe kumuitaba.[34] Tuvua bamulaye kumpala kua Mvidi Mukulu bua kumutumikila.

³Nanku katubengi bumfumu buende. Katutungunuki ne malu adiye udiwula. Bualu mukalenga udi wenza amu tshidiye musue.

⁴Udi mua kukumbaja bidiye wamba, nansha biobi munyi. Muntu kena mua kumukonka kenzela ka bualu budiye wenza.

⁵Muntu udi witaba diyi diende, kakumona bualu bubi to. Kadi muntu wa meji udi mumanye bidiye ne bua kuenza, kabidi diba didiye ne bua kubienza.

⁶Bualu nebalumbuluishe bantu dituku dikuabu bua malu onsu avuabu benza. Bualu bubi bua muntu mbupite bunene.[35]

⁷Kadi katuena bamanye bidi ne bua kuenzeka. Wakambila muapita malu nnganyi?

⁸Muntu nansha umue kena ne mushindu wa kushala ne muoyi panu. Muntu nansha umue kena mua kuseja dituku dia lufu luende panyima.[36] Ke mvita idi muntu nansha umue kayi mua kunyema. Muena tshibawu nebamunyoke kamuyi mpata.

⁹Mvua mukenkete bionsu bidi bienzeka pa buloba. Bantu bakese badi ne bumfumu, bakengesha bantu nabu.

¹⁰Meme kumona bantu babi bavuabu bajika. Bantu babi abu bavua bayayaya pabu mu nzubu wa Mvidi Mukulu. Nanku bantu bakavua bamane kupua muoyi malu awa bantu babi aba benza mu tshimenga tshia Yerushalayime. Ebi bionsu kabidi bidi amu tshianana.[37]

¹¹Muntu udi wenza malu mabi kabena bamunyoka mpindiewu. Ke padi bantu benza malu mabi misangu yonsu.

¹²Nanku muntu mubi udi mua kuenza bibi misangu lukama, kushala amu ne muoyi matuku mavule. Ndi mumanye kabidi mudibu bamba ne: “Amu bantu badi batshina Mvidi Mukulu nebapete diakalenga, bualu badi banemeka bumfumu buende.

¹³Kadi muntu udi wenza malu mabi, kakuikala ne diakalenga. Kakunenga panu. Neafue ne bidimu bikese bualu kena utshina Mvidi Mukulu to.[38]?”

¹⁴Kadi badi bamba nenku, badi bakula tshianana. Bualu misangu mivule, makenga awa ne bua kukuata bantu babi, atu akuata amu bantu bimpe. Imue misangu kabidi bantu babi badi bapeta masanka awa bantu bakane ne bua kupeta. Ndi njadika ne: ebi bionsu kabidi bidi tshianana.

¹⁵Nanku ndi ngamba ne: mbimpe bantu basanke. Bualu diakalenga dia muntu panu ke kudia, kunua ne kusanka. Ke difutu dia mudimu wende matuku onsu adi Mvidi Mukulu mumuteke pa buloba.[39]

¹⁶Mvua muenze muanyi muonsu bua kumanya mudi muntu mua kupeta meji. Mvua njooja kabidi midimu idi bantu bakuata pa buloba. Meme kumona ne: nansha tuetu bashale ne tshitabela munya ne butuku, katuena mua kumanya mudi Mvidi Mukulu upita ne malu onsu adi amueneka pa buloba to. Nansha tuetu bakeba bapungila, katuakumanya mudi Mvidi Mukulu ukuata mudimu. Muntu wa meji udi wamba ne: meme ndi mumanye, udi udidinga.