Read Tshiluba Musambu muimpe Mutambe 1 Bible Online

Musambu muimpe Mutambe 1 - Tshiluba bible

Musambu muimpe Mutambe 1

¹Ku misambu yonsu idi Shelomu[1] mufunde, ewu udi muimpe mupite mikuabu. Diyuki dia badi banangangana

²Ungupukile, ungele mu tshitupa! Dinanga diebe didi dinsankisha dipite mvinyo,

³dipite mafuta ebe a mupuya muimpe. Wewe udi ulobesha bakaji, bu manananshi adi anunka dipembu dimpe. Ke mudi nsongakaji yonsu ikunangila!

⁴Unkuate ku tshianza, tuye nebe lukasa. Mukalenga wanyi, umbueje mu tshibambalu tshiebe, tusanke bubidi buetu. Tusangale, bualu dinnanga diebe ndisheme dipite maluvu. Ke padi nsongakaji yonsu ikunanga.

⁵Nsongakaji ya mu Yerushalayime, meme ndi mufiike, kadi ndi muimpe, mudi nzubu ya ntenta ya bantu badi mu tshipela, mudi bilamba bilembeleja mu nzubu wa mukalenga Shelomu.

⁶Kanukemi bua bufiike buanyi, bualu munya mmumfiikishe nenku. Bana betu ba balume mbangumvuile lukinu, mbanteke bua kubalamina madimi a mvinyo. Kadi buanyi budimi bua mvinyo, tshivua ne mushindu wa kubulama nansha.

⁷Wewe undi munange, ungambile muaba uudi udishila mikoku yebe, uudi uyiteka bua kuikishayi munda munya, bua tshipambuku,[2] tshikukebi muaba udi balunda bebe badishila mikoku yabu.

⁸Wewe Ntamba bakaji, pawikala kuyi mumanye muaba udiye, tangila miaba ivua mikoku yende ipitshila, uyilonde. Shiya mbuji yebe pabuipi ne nzubu ya balami ba mikoku.

⁹Munanga wanyi, ndi nkufuanyikija ne nyama muimpe wa kabalu mukaji, udi ukoka ditempu dia lumu dia mukalenga wa bena Ejipitu.

¹⁰Tukanu mudi muele ku matshi ntulengeje matama ebe. Mabue a busanga mmalengeje nshingu webe.

¹¹Netukuenzele tukanu tua ku matshi tua tshiamu tshia mpawungi, tulamakaja ne tulengejilu tua tshiamu tshitoke tshia mushinga mukole. 1

¹²Patshidi mukalenga wanyi ulala pabuipi nanyi pa bulalu, manananshi anyi adi atuma dipembu diawu.

¹³Munanga wanyi udi bu kabuki ka manananshi, kateka mu mabele anyi.

¹⁴Udi bu tshisumbu tshia bilongu mu madimi a mvinyo a ku mpokolu wa Ene-Ngedi.[3]

¹⁵Mulunda wanyi munanga, udi muimpe mutambe, udi mulengele be. Mesu ebe adi aleja dinanga, bu dia nyunyi wa nkudimba.

¹⁶Munanga wanyi, wewe kabidi udi muimpe be, muimpe wa dikema! Bulalu buetu mbua mashinde mabishi.

¹⁷Makunji a nzubu wetu ke mitshi ya sedre; mikamba ya ku tshimana, ke mitshi ya siprese.