Read Tshiluba Musambu muimpe Mutambe 2 Bible Online

Musambu muimpe Mutambe 2 - Tshiluba bible

Musambu muimpe Mutambe 2

¹Meme ndi tshilongu tshia patupu, tshia mu mpata wa Sarone, tshilongu tshitoke tshia mu tshibandabanda.

²Eyowa, padi munanga wanyi munkatshi mua bansongakaji nende, udi bu tshilongu tshitoke munkatshi mua mingonga.

³Padi munanga wanyi munkatshi mua bansongalume nende, udi bu mutshi muimpe wa bimuma munkatshi mua mitshi ya ditu. Ndi ne disanka dia kuikisha mu dileji diawu, dia kupola bimuma biawu bisheme.

⁴Uvua mutufile mu nzubu wa bukalenga wa masanka, mumbandishile dibendele, dibendele dinyika “Dinanga.”

⁵“Undishe tumuma tua mvinyo, umpeshe bimuma, umpingajile bukole, bualu dinanga didi dinsamisha muoyi.”

⁶Udi mungele diboku diende dia bakaji ku nshingu, mungele mu tshitupa ne diende dia balume.

⁷“Eyi! Nuenu nsongakaji ya mu Yerushalayime, ndi nnusengelela ne: mu dina dia ngulungu idi ne bowa, kanututshinyishi nansha! Tudi tunangangana, nutushiye nkayetu![4]”

⁸Telejayi: munanga wanyi ukadi ufika! Udi wenda utupika mu mikuna minene, usambuka lubilu mikuna mikese.

⁹Munanga wanyi udi unyema lubilu, bu nyama wa kabuluku, nansha bu ngulungu muana. Ukadi mufike, muimane kunyima kua tshimana tshia nzubu wetu. Udi upalamina ku madidishi, ukenzakana mu masosu a tukanu.

¹⁰Mpindiewu udi ungambila ne: “Musuibue wanyi, tuyayi, mulengele wanyi, kolesha, patuka!

¹¹Tshikondu tshia mashika ntshimane kupita! Mvula mmukamuke, mmushadile kule.

¹²Bilongu bidi biela nzeba mu ditunga! Ke tshikondu tshidi bionsu bimba misambu. Nyunyi ya tumanda nkutshi idi idila mu madimi etu miaba yonsu.

¹³Bimuma bibishi[5] bidi bidiunda ku mutshi wa mfiku. Mionji ya mvinyo idi yela bilongu, itangalaja dipembu diayi dimpe. Mulunda wanyi, juka lukasa! Munanga wanyi, katuye!

¹⁴Musuibue wanyi, bu nkudimba udi musoksome mu mbuebue ne mu mulundu, patuka, nkumone. Akula, nteleje diyi diebe didi dinsankisha. Leja mpala webe udi mupite buimpe!”

¹⁵“Utukuatshile nyama ya tubundi eyi, tunyama tukese etu, tudi tunyanga mionji yetu ya mvinyo, mimane kuela bilongu!”

¹⁶Munanga wanyi, udi amu wanyi meme! Meme kabidi ndi amu wende! Udi upeta biakudia biende, muaba udi bilongu bitoke bivule.[6]

¹⁷Ku dilolu padi panshi patalala, kuisu kutuadija kufiika, neupingane kundi, munanga wanyi. Unyeme lubilu bu kabuluku, nansha bu ngulungu muana, udi usomba mu mikuna mipanduluke.[7]