Read Tshiluba Musambu muimpe Mutambe 3 Bible Online

Musambu muimpe Mutambe 3 - Tshiluba bible

Musambu muimpe Mutambe 3

¹Butuku pamvua mulale, meme kulota, nkeba munanga wanyi. Meme kumukeba, tshiyi mumupete.

²Meme kujuka kuya mu tshimenga, kuendakana mu misesu ne mu mansanga a njila, kukeba undi munange. Meme kukenzakana miaba yonsu, nansha meme kumumona.

³Meme kusambakena ne balami ba tshimenga, badi benda batentekela musoku, kubakonka ne: “Nuvua bamoneku munanga wanyi anyi?”

⁴Amu ndayangana nabu, meme kupeta munanga wanyi, kumukuata bikole ku tshianza, tshiyi musue kumulekela. Meme kuya nende mu nzubu, kubuela mu tshibambalu tshia munda, muaba uvua mamu wanyi mungimite.

⁵“Eyi! Nuenu nsongakaji ya mu Yerushalayime, ndi nnusengelela ne: mu dina dia ngulungu idi ne bowa, kanututshinyishi nansha! Tudi tunangangana, nutushiye nkayetu![8]”

⁶Nganyi udi ufuma nenku mu tshipela,[9] bu divuba dia muinshi, divuba didi dinunka mupuya wa kamonya, dinunka manananshi a mipuya mishilangane, afuma ku matunga a bende.

⁷— Ke tshipoyi tshia mukalenga Shelomu. Bena mvita makumi asambombu, bilobu bia bena Izrayele, badi bamunyungulukila.

⁸Bonsu badi ne miele ya mvita, bamanye mua kuluangana nayi. Muntu yonsu mmuase muele ku mikaba, bua kudilama butuku ku njuwu ya lufu.

⁹Shelomu mmuenzeje tshipoyi ne mabaya mempe a mu Lebanone.

¹⁰Uvua mutshiashishe mikolu ya tshiamu tshitoke tshia mushinga mukole, tshieyeminu tshia tshiamu tshia mpawungi, tshisombelu tshia tshilamba tshifikuluke tshia lumu.[10] Nsongakaji ya mu Yerushalayime ivua milengeje ne muoyi wa dinanga munda muonsu mua tshipoyi.

¹¹“Eyi, nsongakaji ya mu Yerushalayime, luayi, nutangile mukalenga Shelomu! Udi muase tshifulu tshivua mamuende mumupe dituku dia tshibilu tshia dibaka, divuaye musanke mutshionkomoke.”