Read Tshiluba Musambu muimpe Mutambe 4 Bible Online

Musambu muimpe Mutambe 4 - Tshiluba bible

Musambu muimpe Mutambe 4

¹Munanga wanyi, udi muimpe mutambe. Udi mulenga tshishiki! Mesu ebe adi engelela ne dinanga, bu nyunyi ya nkudimba, nansha wewe muabuikile ne tshilamba. Nsuki yebe idi ipepa pa makaya, mudi mbuji mifiike tshisumbu ipulumuka pa mukuna wa Ngilaade.

²Menu ebe adi matoke, mafuane mikoku mimane kukosa boya, ifumina ku diowa mayi. Idi yenda ibidi ibidi bu bana ba mapasa, kamuena muaba udi mushale mutupu.

³Mishiku yebe mimpe idi bu mukaba mukunze. Idi ikuatshisha milowu paudi wakula. Matama ebe adi makunze, bu tshipese tshia tshimuma tshia ngrenade, muinshi mua tshilamba tshiudi muabuikile.

⁴Nshingu webe udi mule muenze tshijengu bu kaleya ka Davide, kadibu balembeleje ngabu tshinunu, ngabu ya tshijengu ya bilobu bia mvita.[11]

⁵Mabele ebe adi bu bana babidi ba mbuji, bana ba mapasa ba nyama wa kabuluku, badi badia mashinda muaba udi bilongu bitoke.

⁶Ku dilolu padi panshi patalala, kuisu kutuadija kufiika, nenye kuikisha ku mukuna webe wa manananshi, ku kakuna kebe ka musenga wa kamonya.[12]

⁷Munanga wanyi, mubidi webe mujima udi muimpe, kauyi kalema nansha kamue.

⁸Mubangila wanyi, tuyayi, shiya mikuna ya Lebanone. Umuke ku nsongu ya mukuna wa Amane, wa Senire ne wa Ermone,[13] miaba idi nyama ya ntambue, ne ya nkashama isombela.

⁹Paudi untangila musangu amu umue, muoyi ukadi untuuta bikole munda. Muanetu wa bakaji, mubangila wanyi, meme mutangile nansha kakanu kamue ka tudi tulengeja nshingu webe, tuengelela, kadi kankuata kashidi, kambueja mu nzubu wa lukanu.

¹⁰Mubangila wanyi, muanetu wa bakaji, dinnanga diebe ndinkokeshe, ndinkuate bikole mudi maluvu kaayi mua kunkuata. Mafuta ebe a mupuya adi ansankisha, mapite mafuta makuabu onsu.

¹¹Mubangila wanyi, mishiku yebe idi imatshisha buitshi. Buitshi ne mabele bidi muinshi mua ludimi luebe. Mupuya wa bilamba biudi muvuale, udi bu wa mitshi yonsu misanga ya mu Lebanone.

¹²Mubangila wanyi, muanetu wa bakaji, udi budimi buanyi bunyungulula kudi lupangu, udi mayi anyi a mpokolu mabuikila matue tshitampi.

¹³Udi bu lupangu luimpe[14] lua mitshi ya ngrenade, idi ikuama bimuma bisheme. Mudi bilongu ne mitshi bishilangane bidibu mua kuenza nabi manananshi a mishindu ne mishindu.

¹⁴Mudi mitshi idibu benza nayi enna, narde, safrane, kalmuse, musenga wa kamonya, mire ne alowe, kabidi ne mafuta a mupuya muimpe.

¹⁵Munda mua lupangu mudi mpokolu wa mayi mimpe matambe adi afuma ku mikuna ya Lebanone.

¹⁶Mpepele ya ku mutu ne ya kuinshi, tabalayi, luayi lukasa, tangalajayi dipembu dionsu didi mu lupangu luanyi. Miaba yonsu inunke mupuya muimpe! Munanga wanyi, luaku, buela mu lupangu luanyi, udie bimuma bisheme bidi momu.