Read Tshiluba Musambu muimpe Mutambe 5 Bible Online

Musambu muimpe Mutambe 5 - Tshiluba bible

Musambu muimpe Mutambe 5

¹Muanetu wa bakaji, mubangila wanyi, ndi mbuela mu budimi buanyi, mpolamu mire wanyi, ne mitshi ya mupuya muimpe, ndilamu buitshi buanyi, nnuinamu maluvu ne mabele anyi. “Balunda banyi, nudie, nunue, dinanga dinukuate.”

²Mvua mulale, kadi muoyi wanyi uvua mushale ne tshitabela. Badi bakokola ku tshiibi! Ndi mumanye ne: munanga wanyi mmufike! “Muanetu wa bakaji, munanga wanyi, nkudimba wanyi, wanyi wa pa muoyi, ungunzuluile ku mbelu! Mutu wanyi mmuboleshe kudi lumuma, nsuki yanyi mmikuate mayi a dibungi dia butuku.”

³“Ndi mumane kuvula bilamba bianyi, tshiena mua kubivuala kabidi nansha! Ndi mumane kuowa mayi ku makasa, mmunyi mundi mua kuafikisha kabidi?”

⁴Diba adi, munanga wanyi, kuela tshianza ku disosu didi ku tshiibi. Muoyi uvua ungomba bikole.

⁵Diakamue meme kujuka, kunzuluka munanga wanyi ku mbelu. Mafuta a mire avua ku bianza ne ku minu, pamvua ndenga milonda ivua ku tshiibi.[15]

⁶Meme kunzuluka munanga wanyi ku mbelu lubilu. Kadi ukavua mumane kuya. Kavua kabidi ku tshiibi. Mvua njinga bikole kumvua diyi diende. Meme kumuipatshila, kumukeba, kadi nansha meme kumumona. Meme kumubikila, kadi kavua mungitabe.

⁷Meme kusambakena ne balami ba tshimenga, bavua batentekela musoku, bendakana pa bimana bia tshimenga. Bobu kuntuuta, kuntapa mputa, kunyengabu ne tshitambala tshianyi.

⁸“Eyi, nuenu nsongakaji ya mu Yerushalayime, ndi nnulomba, nnusengelela ne: nuenu basambakena ne munanga wanyi, nenumuambile tshinyi? Numuambile ne: Dinanga ndinsamishe muoyi!”

⁹“Mukaji mulengele, utuambile: munanga webe mmupite balume bakuabu ku tshinyi? Eyowa, tshidiye mupite natshi bakuabu ntshinyi, bua wewe kutusengelela bikole nenku?”

¹⁰Munanga wanyi udi muimpe mutambe bu tshiamu tshikunze. Udi wa bukole bupite. Ku bantu binunu dikumi amu umue udi mumufuane!

¹¹Mpala wende udi wengelela bu tshiamu tshia mpawungi. Udi ne nsuki miluka bikata bikata bu bilongu bia mutshi wa date; nsuki yende mmifiike bu masala a nyunyi wa tshikolotu.

¹²Mesu ende adi engelela bu a nyunyi ya nkudimba idi miname mu mayi. Adi matoke bu masukula ne mabele, majalame biakane mu kashete ka bilengejilu.[16]

¹³Matama ende adi bu dibula dinunka bimpe, dikuna[17] bilongu bia mupuya muimpe. Mishiku yende idi yengelela bu bilongu bikunze, mafuta a mire adi azonzaku.

¹⁴Maboku ende adi bu lukanu lua tshiamu tshia mpawungi, lulengeja ne mabue mafiike a mushinga mukole. Mubidi wende udi bu mubanga mupela, mulengeja ne mabue a safire.[18]

¹⁵Mikolu yende idi bu makunji a mabue matoke masonga, mashindika bikole pa bitaku bia tshiamu tshia mpawungi. Udi mufuane mikuna ya mu Lebanone. Udi ne bukole bu bua mutshi wa sedre.

¹⁶Mukana muende mmusheme, padiye untua mishiku. Mubidi wende mujima udi unkuatshisha milowu! Nsongakaji ya mu Yerushalayime, ke mudi munanga wanyi, ke mudi mulunda wanyi nanku.