Read Tshiluba Musambu muimpe Mutambe 6 Bible Online

Musambu muimpe Mutambe 6 - Tshiluba bible

Musambu muimpe Mutambe 6

¹Wewe nsongakaji mupite buimpe, munanga webe mmuye penyi? mMuyile njila kaayi? Tudi basue kumukeba pamue nebe.

²Munanga wanyi mmuye mu lupangu luende, mudi mabula makuna bilongu binunka bimpe; mmuye kudishilamu bimuna, kutulamu bilongu bitoke.[19]

³Munanga wanyi udi amu wanyi meme, meme kabidi ndi amu wende. Udi udisha bimuna munkatshi mua bilongu.

⁴Munanga wanyi udi muimpe. Udi mulengele bu tshimenga tshia Tirsa. Udi wengelela bu Yerushalayime. Udi ukemesha bu bimenga bibidi ebi.[20]

⁵Lekela kuntangila. Mesu ebe adi ampampakaja. Nsuki yebe idi ipepa, bu mbuji tshisumbu idi ipulumuka pa mukuna wa Ngilaade.

⁶Menu ebe adi matoke, mafuane mbuji ya mikoku, idi ifuma ku diowa dia mayi. Idi yenda ibidi ibidi, bu bana ba mapasa. Kamuena muaba udi mushale mutupu.

⁷Matama ebe adi makunze, bu tshipese tshia tshimuma tshia ngrenade, muinshi mua tshilamba tshiudi muabuikile.

⁸Nansha mukalenga musele bakaji makumi asambombu, mubanjije bakuabu makumi muanda mukulu, ne bansongakaji kabayi kubala,

⁹meme ndi mumone ne: mudi amu mukaji umue panu. Ke wewe, nkudimba wanyi, wanyi wa pa muoyi. Mamuebe uvua amu ne muana wa bakaji umue. Ke wewe uvuaye mupite kunanga ku bana bende bonsu. Padi bakaji bakuabu bakutangila, badi bakuamba muena diakalenga. Ba mukalenga mukaji, ne bakaji babanjija badi bakutua makumbu,[21] bamba ne:

¹⁰“Ewu mmukaji kaayi, udi ukenka bu nkesha, udi mutoke bu ngondu, ubalakana bu diba, ukemesha bu mitotu?[22]”

¹¹Meme kupueka mu lupangu lua mitshi ya bimuma, bua kumona ntonga idi mu tshibandabanda, kutangila mionji ya mvinyo idi isampila, kujoja bilongu bidi ku mitshi ya ngrenade.[23]

¹²Ndi mpampakana bikole. Ndi njinga dinanga, mudi muendeshi wa ditempu ujinga kuya mu mvita.[24]