Read Tshiluba Musambu muimpe Mutambe 7 Bible Online

Musambu muimpe Mutambe 7 - Tshiluba bible

Musambu muimpe Mutambe 7

¹— Wewe muena Shulame, nyunguluka, nyunguluka, nyunguluka kabidi, wanyishe tukutangile! — Nudi nubandila muena Shulame, padiye uja maja, bua tshinyi?[25]

²Mukalenga mukaji, makasa ebe mmimpe mu bisabata, tshimonu tshiebe tshidi bu mabue mafula kudi nsenda wa bushiwa.

³Kuinshi kua difu diebe,[26] kudi bu dikopu didi ne maluvu a muenya muimpe diba dionsu. Difu diebe didi bu miepu munkatshi mua bilongu.

⁴Mabele ebe abidi adi bu mbuji ya nkungulu ibidi, bu bana ba mapasa ba ngulungu.

⁵Nshingu webe mmufuane Kaleya-ka-mubanga. Mesu ebe adi bu majiba a mayi a mu Eshebone, adi ku tshiibi tshia tshimenga tshinene etshi.[27] Diulu diebe kabidi didi dimpe bu kaleya ka mu Lebanone, kadi kalama njila wa ku Damase.

⁶Mutu webe udi mululame, bu mukuna wa Karmele. Nsuki yebe idi mimpe be! Mmikuate mukalenga mu buteyi buayi.[28]

⁷Munanga wanyi, udi muimpe, udi undengelela, bikuatshisha milowu![29]

⁸Udi mufuane dibue dia ngaji ku bule, mabele ebe adi bu bishishi bia ngaji ayi.

⁹Ke meme kuamba ne: “Ndi mbanda kulu, ntungule ngaji!” Mabele ebe adi bu bisumbu bia tumuma tua mvinyo. Mupuya webe udi ne dipembu dimpe bu dia bimuma bisheme.

¹⁰Miaku idi ipatuka mukana muebe, idi inkuata mudi mvinyo muimpe ukuatangana! Eyowa, mvinyo muimpe udi upueka buludi kudi munanga wanyi, ubuela mu mishiku yetu nansha tuetu balale tulu.

¹¹Munanga wanyi udi wanyi meme; udiye ujinga udi amu meme.

¹²Munanga wanyi, luakunu, tupatuke mu mpata, tutshishile butuku munkatshi mua bilongu[30] bidi ne mupuya muimpe.

¹³Netuikale mu madimi a mvinyo dinda dionsu, netumone mudi mionji mimane kusampila, miele ntonga; mudi mitshi ya ngrenade miele nzeba. Muaba awu nenkuleje mundi nkunanga.

¹⁴Bimuma bia mandragore,[31] bidi binunka mupuya muimpe. Kumbelu kuetu tudi ne bimuma bisheme bia mishindu yonsu, bia kale nansha bipiabipia. Munanga wanyi, ndi mukulaminebi.