Read Tshiluba Musambu muimpe Mutambe 8 Bible Online

Musambu muimpe Mutambe 8 - Tshiluba bible

Musambu muimpe Mutambe 8

¹Eyi! Kutshikadi nansha muanetu wa balume, uvua mamu muamushe. Pandi nsambakena nebe mu njila, mvua mua kukuela mu tshitupa, kukutua mishiku, muntu nansha umue kayi ungelela meji mabi.

²Tuvua mua kuya nebe ne mu nzubu mua mamu wanyi. Wewe kundongesha dinanga. Meme kukulabuisha maluvu anyi mempe a muenya musheme, ne mayi anyi a bimuma bia ngrenade.

³Udi mungele diboku diende dia bakaji ku nshingu, mungele mu tshitupa ne diende dia balume.

⁴“Eyi! Nuenu nsongakaji ya mu Yerushalayime, ndi nnusengelela ne: kanututshinyishi nansha! Tudi tunangangana, nutushiye nkayetu.[32]”

⁵Ewu mmukaji kaayi udi utumina mu tshipela, mueyemine munanga wende? Ndi nkujula ku tulu, muinshi mua mutshi wa bimuma, muaba uvua mamuebe mukuimite, muaba uvuaye mukupatule mu bantu.

⁶Ngikale nkayanyi mu muoyi webe; muoyi webe wikale mukanga, mutua tshitampi. Unkuate amu meme mu maboku ebe. Dinanga didi ne bukole bu bua lufu. Mukawu mmunkuate bikole, bu dijimba dia bafue. Dinanga didi dingosha bu kapia, bu kapia ka Maweja-Nangila.[33]

⁷Mayi manene malabale kaena mua kujima kapia ka dinanga. Misulu yonsu kayena mua kukajibakaja. Nansha muntu musue kusumba dinanga, kufuta biuma bionsu bidiye nabi, neapete amu kapeja.

⁸Tudi ne muanetu wa bakaji, kadi utshidi muana mutekete. Kena muanji kuasa mabele to. Netumuenzele tshinyi, padi diba dia kumusela dikumbana?

⁹Nansha yeye bu tshimana tshikole, tshia mualu wa mvita, netuibakilepu tuleya tua tshiamu tshitoke tshia mushinga mukole. Nansha yeye bu tshiibi, netutshipayike bikole ne mabaya a mutshi wa sedre.

¹⁰Meme ndi bu tshimana tshikole, mabele anyi adi bu tuleya. Kadi buende yeye, ndi diende diakalenga.[34]

¹¹Shelomu udi ne budimi bua mvinyo, ku Baale-Amone.[35] Kubupaye babidime, bua bafute nkanu mitoke ya mushinga mukole tshinunu, bua bamone mua kupola bimuma.

¹²Wewe Shelomu, wangate nkanu tshinunu ya tshiamu tshitoke tshia mushinga mukole. Babidime bapete kabidi nkanu nkama ibidi. Kadi budimi buanyi meme ndi ndima amu meme nkayanyi!

¹³Munanga wanyi, wewe udi mu lupangu, muaba udi balunda bateleja ne ntema, bakeba kumvua diyi diebe. Kadi, ungambile amu meme ne:

¹⁴“Munanga wanyi, patuka lukasa, tunyeme bu nyama wa kabuluku, bu ngulungu muana, tuye ku mikuna idi inunka dipembu dimpe.[36]