Read Tshiluba Meji 1 Bible Online

Meji 1 - Tshiluba bible

Meji 1

¹Nuenu balombodi ba bantu, nangayi buakane. Tuntayi meji enu buludi kudi Maweja-Nangila. Kabidi numukebe ne muoyi wa bupuekele.

²Bualu badi kabayi bamutete ke badi bamupeta. Udi udileja kudi badi bamutekemena, ke badiye umuenekela.

³Meji mabi adi umusha bantu kudi Mvidi Mukulu. Kadi muntu udi upadila bukole bua Mvidi Mukulu, neafue bundu.

⁴Meji[1] kaena asomba munda mua muntu udi wenza bibi, nansha mu muoyi wa mupika wa bubi.

⁵Meji ke Mueyelu wa Mvidi Mukulu, udi ulombola bantu, udi ubenga bonsu badi ne mioyi ibidi, udi unyema bantu badi ne lungenyi lua bupale. Udi umuka kudi muena kansungansunga.[2]

⁶Meji adi ananga bantu. Adi anyoka muntu udi upenda Mvidi Mukulu. Bualu Mvidi Mukulu udi mumanye meji a bantu, udi mumanye tshidi mu muoyi wabu, udi umvua tshidibu bamba.

⁷Mueyelu wa Maweja-Nangila udi pa buloba bujima. Mmutusange bonsu pamue, mmumanye bionsu bidi bantu bamba.

⁸Maweja-Nangila udi mumanye muakudi wa bibi, muntu awu neapete dinyoka didi dimuakanyine.

⁹Kumpala kua Mvidi Mukulu, meji a bantu babi adi atanduka. Miaku yabu idi ifika kudi Maweja-Nangila. Nanku nebapete dinyoka dia pa bubi buabu.

¹⁰Maweja-Nangila udi uteleja bionsu ne ntema. Udi umvua too ne manunganyi makese.

¹¹Lekelayi kuamba bakuabu bibi. Lekelayi bijanu. Mvidi Mukulu udi mumanye biudi wamba mu musokoku, neakuebeje. Muntu udi ushiminyinangana malu udi udikebela kabutu.

¹²Kanudikebedi lufu ku buenzayi buenu. Kanudifuishi bua ngenzelu yenu mibi.

¹³Mvidi Mukulu kena mufuke muntu bua kufuaye. Kena usanka padi muntu ufua.[3]

¹⁴Wakabika bintu bionsu bua bikalepu. Bifukibua bionsu bidi biambuluishangana bua kupeta muoyi. Bifukibua kabiena mua kushipangana. Mvidi Mukulu ke udi mfumu wa pa buloba, ki ndufu nansha.

¹⁵Muntu muakane kena ku bupika bua lufu to.[4]

¹⁶Bantu babi badi badikebela lufu ku bidibu bamba ne ku bidibu benza. Badi badia bulunda ne lufu,[5] kabidi batua nalu ndondu. Ke padibu bumvuangana ne lufu.