Read Tshiluba Meji 10 Bible Online

Meji 10 - Tshiluba bible

Meji 10

¹Meji avua malame muntu uvuabu bafuke ku tshibangidilu, ke tatu wa bantu bonsu, uvua amu nkayende. Pavuaye muenze bibi, wowu ke avua mamumushe[47] ku bubi,

²mamupe bukole bua kuikala mfumu wa bintu bionsu.[48]

³Kadi muntu wa lonji kuabulukangana ne Meji. Ku tshiji tshikole, kushipaye muanabu.[49]

⁴Kadi bua bubi ebu, buloba bujima buvua budiina mu mayi, kadi Meji kupandisha buloba kabidi. Meji akendesha muntu muakane mu buatu butekete buenza ne mabaya.

⁵Diba divuabu banyoka matunga, bua meji mabi avuawu mela, bakapanga muakulu umue, kabatshiyi kabidi bumvuangana, Meji avua masungule muntu muakane munkatshi muabu, kumulama kayi kalema kumpala kua Mvidi Mukulu, kumupa bukole bupite bua kunemeka diyi dia Mvidi Mukulu, kumpala kua dinanga divuaye munange nadi muanende.[50]

⁶Pavuabu bashipa bantu babi, Meji ke avua mapandishe muntu muakane. Avua mamuambuluishe bua kunyema kapia kavua kuosha bimenga bitanu.[51]

⁷Bua kujadika bubi bua bimenga ebi, utangile buloba ebu buume butshidi butungunuka ne difuima muinshi. Mitshi yamu idi ikuama. Kadi bimuma biayi kabiena biboba pa tshitshia tshiabi. Dikunji dia mukele didi dituvuluija muntu uvua kayi muangate mibelu ne mushinga.[52]

⁸Bualu bantu ba mu bimenga ebi, badi badiombola meji, kabena basunguluja bidi bimpe ne bidi bibi. Bimenga ebi binyanguke bitshidi bituvuluija lelu muvua bantu aba batshimbakane. Nanku bilema biabu, katuena mua kubipua muoyi.

⁹Kadi Meji akasungidila bantu ku makenga onsu.

¹⁰Dimue dituku, muntu muakane kunyema muanabu uvua mumufikile munda. Meji avua amuludika mu njila muakane, avua amuleja bukalenga bua diulu, malu masokome a Mvidi Mukulu. Avua amututshisha dikasa dimpe mu midimu yende, kabidi amupetesha tshipeta tshilenga mu ntatu yende.[53]

¹¹Meji avua amukuba ku lubabu lua bantu bavua bajinga bua kumunyenga bintu. Ke kumuenzawu mubanji.

¹²Avua amulama ku baluishi bende, bavua bakeba mua kumuelela tshitungu. Akamupa bukole bua kutshimuna myita mikole[54] bua amanye ne: kulamata Mvidi Mukulu kudi kupita bionsu bukole.

¹³Meji kaavua malekela muntu muakane uvuabu bapanyishe ku bupika, kadi akamufula ku dienza bubi.[55]

¹⁴Meji akaya nende ne mu lukanu, kusomba nende pavuabu bamusuika nkanu too ne muvuilewu kumupa bukalenga, kabidi ne bukenji pa bantu bavua bapite kumukengesha. Nanku Meji kujadika ne baluishi bende bavua bena dishima. Ke Meji kumupesha lumu lua kashidi.

¹⁵Meji avua mapandishe tshisamba tshia tshijila, tshisamba tshidi katshiyi ne bualu, atshipatula mu bupika bua bantu bavua babanyange.

¹⁶Avua mabuele mu muoyi wa muena mudimu wa Maweja-Nangila. Bamfumu bavua bakuatshisha bowa, Meji avua abaluisha ne bishima bia dikema.[56]

¹⁷Kufutawu bavua balamata Mvidi Mukulu bua midimu yabu mikole. Avua abaludika mu luendu lua dikema. Kubabuikilawu ne mundidimbi mu munya, butuku mitotu[57] kubaleja bukenke buawu.

¹⁸Kubasabuishawu mayi manene ku makasa, kubapitshisha mu mayi mondoke.

¹⁹Kadi Meji kuela bitalu bia baluishi babu ku muelelu wa mayi.

²⁰Nenku ke bakane kupawula bionsu bivua kudi badi babenga Mvidi Mukulu. Kutuadijabu bonsu pamue kutumbisha dina diebe dia tshijila, dia Maweja-Nangila, bualu bukole buebe buvua bubapandishe.[58]

²¹Meji avua makuishe tumama, kabidi muakuishe ne bana batekete.[59]