Read Tshiluba Meji 11 Bible Online

Meji 11 - Tshiluba bible

Meji 11

¹Meji akayisha midimu ya bena Izrayele kumpala ne diambuluisha dia muambi wa tshijila.[60]

²Bavua bakosoluela mu tshipela tshivua muntu kayi muasa. Kuasabu mitanda yabu miaba ivua bantu katshia kabayi bafika.

³Bobu kukolela baluishi babu, kuipata bavua babenga ku tshiabu.

⁴Bena Izrayele bavua ne nyota, kukubikilabu. Maweja-Nangila wewe kubapa mayi a kunua, auvua mupatule mu lubuebue, wewe kubatalaja muminu ne mayi a mu dibue dikole.[61]

⁵Pavua bantu bebe mu dikenga, uvua mubapandishe ne mayi mine auvua munyoke nawu baluishi babu.

⁶Musulu wa mayi avua apueka kaayi akama, uvua muunyange ne mashi, bua kubanyoka pa dishipa diabu dia bana batekete. Kadi bantu bebe, wewe kubapandisha ne mayi, avuabu kabayi batekemena nansha kakese.[62]

⁸Uvua muanyishe bua bantu bebe bumvue nyota, bua bumvue muuvua munyoke baluishi babu.

⁹Nansha muuvua mubabele ne luse, kadi bavua bajingulula mushindu uuvua munyoke ne tshiji bonsu badi bakubenga.

¹⁰Uvua munyoke bantu bebe bu mudi tatu ubela bana bende pa kubakolesha, kadi udi ulumbuluisha bena lukuna babu bu mudi mfumu wa disu dikole wenza.

¹¹Baluishi babu bavua bakenga misangu ibidi, bangabanga pavuabu ne bantu bebe, pashishe diba divuabu bashilangane nabu mutantshi.

¹²Bualu dibungama diabu divua dibakuata kabidi, bangabanga bavua batua mikemu pa kuvuluka bivua bibenzekela kale.

¹³Pashishe kumvuabu ne: Maweja-Nangila wakenzela bantu bende bimpe padiye ubapa mayi avuaye munyoke nawu baluishi babu.

¹⁴Bavua bipata muntu uvuabu balekela, bela meji a kumushipa. Kadi mpindiewu padibu ku buana buende bamona bidiye muenze badi bakema, bajingulula ne: Bantu bakane katshia ki mbafile nyota.

¹⁵Bubi buabu buvua buelesha bena Ejipitu meji a budingidingi. Ke patuabu batendelela nyoka ne minga nyama mibi, bifukibua bidi kabiyi ne lungenyi. Bua kubanyoka, wewe Maweja-Nangila uvua mubatumine tshisumbu tshia nyama kayiyi lungenyi.[63]

¹⁶Nenku uvua mubatumine dinyoka dilondeshila mushindu wa tshilema tshiabu.

¹⁷Maweja-Nangila, ku bukole buebe, uvua mufuke buloba ne bintu bia tshianana. Nenku bua kubanyoka, se uvua mua kutumina bantu aba musumba wa nkashama ne ntambue ya lonji.

¹⁸Wewe ke uvua mua kufuka nyama ya lonji lupite mipiamipia, itudi katshia katumonyi, idi ikungula, ipatula kapia pa kueyela, nansha ituila muinshi wa mupuya mubi, nansha ipatula tuntolentole tua kapia mu mesu ayi, lukuatshisha bantu bowa.

¹⁹Uvua mua kuenza nyama mifuanangane nayi, kadi idi kayiyi ishipa bantu pa kubaluisha, padi bantu bayimona patupu, buowa nkayabu bubashipa.

²⁰Kadi bionsu ebi kabiena bualu. Uvua mua kubalondakaja ne buakane buebe, ne mupuya webe nkayawu, kabidi kubatangalaja ne bukole bua mueyelu webe. Kadi bionsu biudi wewe wenza udi mubilongolole, bule buabi, bungi buabi, kabidi ne bujitu buabi.[64]

²¹Wewe udi mua kuleja bukole buebe diba dionsu diudi musue. Muntu nansha umue kena mua kukutuila nkanana.

²²Bantu ba buloba bujima badi amu bu kateta ka lusenga kumpala kuebe, kadi kiinamija kakese tshitempelu. Budi amu bu dimata dia lumuma ludi lumata mu dinda.[65]

²³Wewe udi mua kuenza muonsu muudi musue, ke muudi ufuila yonsu luse. Ke muudi ulengulula bilema bia bantu, ubapa diba dia kudilengejabu.

²⁴Wewe udi unanga tshifukibua tshionsu. Kuena upetula tshintu tshiudi mufuke to. Bualu bu wewe mudiwule tshintu, kuvua mua kutshifuka nansha.

²⁵Tshintu katshiena mua kuikalaku, wewe kuyi mutshisue. Bu wewe kuyi mutshifuke, tshiotshi tshivua mua kuikalaku munyi?

²⁶Maweja-Nangila, udi musue bua bintu bionsu bikaleku, bualu bionsu mbiebe, kabidi udi unanga tshionsu tshidi ne muoyi.