Read Tshiluba Meji 12 Bible Online

Meji 12 - Tshiluba bible

Meji 12

¹Mueyelu webe udi kauyi ufua udi munda mua tshifukibua tshionsu.

²Nenku, ke paudi unyoka ku kakese kabidi ne dinanga badi bakubenga. Udi uleja bantu mudibu bafuana kuenza bibi, udi ubadimuja bua balekele njila yabu mibi, kabidi bua bakuitabe amu wewe Maweja-Nangila.

³Ke muuvua muenzele bantu bavua base kale mu buloba bua tshijila.[66]

⁴Uvua mubakine bua ngenzelu yabu mibi, bavua benza majimbu, batendelela nwidie.

⁵Bavua bashipa bana kabiyi bibenza luse, badia minyinyi ya bantu pamue ne mashi ayi, nansha ne mala mine. Nanku bavua bibidile mu ngenzelu eyi mibi.[67]

⁶Baledi bavua bashipa bana babu balela, bana kabayi ne wa kubasungidila, wewe uvua mubabutuishe kudi bankambua betu.

⁷Uvua musue bua buloba buudi mupite kunanga, buikale muaba uvua bantu bebe mua kusomba ku matshi talalaa.

⁸Kadi nansha baluishi babu uvua amu mubafuile luse, bualu mbantu. Wewe kubatumina mangulunge[68] bangabanga ne wewe kutuma tshiluilu tshiebe bua kubabutula ku kakese ku kakese.

⁹Kabivua bikukolela bua wewe kutuma bantu bakane bua babutule bantu babi mu myita. Uvua mua kubabutula kabidi diakamue ku nyama ya difu, nansha pa kubasamina bikole ne diyi diebe.

¹⁰Kadi uvua mubape mushindu wa kudilengejabu, bualu uvua ubambuluisha ku kakese ku kakese, bua bapete diba dia kuvuluka bubi buabu. Bushuwa uvua amu mumanye muvuabu babalela mu tshisamba tshia bantu babi, kabidi muvua buntomboji buabu bua ku tshilelelu, muvuabu kabayi mua kuandamuna meji abu mabi.

¹¹Tshisamba etshi tshivua tshitshipa bituadija ku tshibangidilu.[69] Pauvua kuyi munyoke bilema biabu, ki mbua ne uvua utshina muntu.

¹²Wewe ke udi mufuke bantu babi aba, kadi muntu nansha umue kena mua kubakuila nansha kukuasa tshilumbu tshia paudi mubabutule to. Nnganyi udi mua kukuamba ne; “Tshiwenji ntshinyi?” Muntu kena mua kutontolola tshiudi mutangile ne ntshimpe.

¹³Kakuena nwidie mukuabu.[70] Kakuena muntu uvua mua kulama bintu bionsu bu wewe. Kakuena muntu nansha umue udi mua kujadikila mudi nsambu iudi ukosa mikale pa yoyi.

¹⁴Kabidi kakuena mukalenga nansha muludiki wa bantu pa buloba, udi mua kukuasa tshilumbu paudi munyoke bantu aba to.

¹⁵Maweja-Nangila udi muakane, ke paudi uludika diulu ne buloba mu buakane. Kuena muanji kunyoka muntu udi kayi mukumbanyine dinyoka.

¹⁶Bukole buebe mpokolu wa buakane. Udi ufuila muntu yonsu luse, bualu udi muludike bintu bionsu.

¹⁷Udi uleja bukole buebe kudi muntu udi kayi witaba dikanda diebe dijima. Udi unyoka muntu udi mumanye bukole buebe, kayi ubuangata ne mushinga.

¹⁸Nenku bu muudi mfumu wa bukole buonsu, udi ukosa nsambu pa yoyi. Udi mua kuenza netu bu muudi musue, kadi udi utuludika ne lutulu luvule.

¹⁹Pa kuenza nanku, uvua mulongeshe bantu ne: muntu muakane udi mua kuleja mudiye munange bakuende. Uvua mupe bantu bebe ditekemena dinene, bualu udi ubapa mushindu wa kudilengeja ku bubi buabu.

²⁰Uvua muleje budimu ne lutulu pa kunyoka baluishi ba bana bebe. Nansha bobu bakumbanyine lufu, uvua mubape amu mushindu wa kubenga bubi buabu.

²¹Nenku udi ukosa bilumbu bia bantu bebe ne budimu bupite, bualu uvua mutue ndondu ne bankambua babu, kabidi uvua mubalaye ne mutshipu bua wewe kubenzela malu a dikema.

²²Eyowa, udi utunyoka, kadi udi unyoka baluishi betu bipite mishindu mivule mishilangane.[71] Nanku patuikala ku mutu kua bakuabu, tuvuluke bulenga buebe. Kabidi paudi utulumbuluisha, tutekemene luse kuudi.

²³Uvua munyoke bavua benza malu bu bantu ba bisamba bikuabu, kadi uvua ubanyoka amu ne bisuabu batendelela.

²⁴Bavua bashale mu ntupakanyi nebe musangu mule. Bavua batendelela tunyama tuvua tuenza muenga. Bavua badipambuisha nkayabu bu bana batekete kabayi lungenyi.

²⁵Uvua mubanyoke bu mudibu banyoka bana badi kabamanyi bualu, wewe kubatshimbisha.

²⁶Kadi bavua kabayi bamone bunene bua dikenga adi, nebapete dinyoka kudi Mvidi Mukulu, dibakumbanyine.

²⁷Bavua babanyoka kudi nyama ivuabu bakukuila bu nwidie. Nenku mesu abu kutabala, kumanyabu ne Mvidi Mukulu ke uvuabu babenga bua kumanya ewu. Bakadi bamanye ne: amu yeye nkayende ke Mvidi Mukulu umuepele mulelela. Ke mushindu uvuabu bapeta dinyoka dipite bunene.[72]