Read Tshiluba Meji 13 Bible Online

Meji 13 - Tshiluba bible

Meji 13

¹Bantu bonsu badi kabayi bamanya Mvidi Mukulu mbatshimbakane. Badi basanka bua bintu bilenga bidibu bamone, kabayi bamanye mua kusunguluja “Mvidi Mukulu mulelela.[73]” Badi bamanya midimu idiye muenze, kadi kabayi bamanye muyenji.

²Bavua bela meji ne: nwidie idi iludika buloba ne kapia, lupepela, mvunde, mitotu idi inyunguluka mulu, nansha mayi adi apueka lubilu, nansha diba ne ngondu.

³Bantu bavua basanka pa kumona bulenga bua bintu ebi, ke pavuabu babielela meji ne: ke nwidie. Kadi badi ne bua kumanya ne: bintu bionsu ebi bidi ne Muludiki umue. Yeye ke udi mupite bifukibua bionsu ebi ku bunene. Bualu udi mubifuke ke mpokolu wa bulenga buonsu.

⁴Bantu padibu bakatshila bulenga buabi ne midimu yabi, bamanye ne mufuki wa bintu ebi ke muena bukole buonsu.

⁵Patuikala tumvua bunene ne bulenga bua bifukibua, tudi ne bua kumvuilemu kabidi udi mubifuke.

⁶Kadi katuena mua kupepeja bantu aba to. Misangu mikuabu bavua bapambuke bua kukeba Mvidi Mukulu ne kupetangana nende.

⁷Bu mudibu basombe munkatshi mua midimu yende, bavua bayikenketa, bayimona bu nwidie, bualu mbayimone miakane.

⁸Kadi bantu aba badi bena tshibawu.

⁹Bu mudibu ne lungenyi lukumbane lua kujandula malu a bantu, mudibu kabayi mua kujingulula Mfumu wa bintu bionsu ebi mmunyi?

¹⁰Diakabi dienu, nuenu badi batekemena kudi bintu bidi kabiyi ne muoyi, badi bakukuila nwidie mienza kudi bantu, bimfuanyi bia nyama bifula ne mpawungi nansha ne tshiamu tshitoke tshia mushinga mukole, nansha bienza kale[74] kudi bantu ne dibue dia patupu.

¹¹Tangilayi tshilejilu tshia mukoshi wa nkunyi,[75] udi ukosa mutshi mulenga, uuvula tshizubu ne mankenda, uupepeja ne meji, udi uwandamuna bintu bidi bilengelela bantu.

¹²Bua bizubu bia mutshi, udi ubiangata bua kulamba nabi biakudia, udia uukuta.

¹³Kadi mu bizubu bivua bishale bua kuimansha, muvua bidi kabiyi ne mudimu, mutshi mukonyangale muikale ne mapu. Udi uwangata, uusonga bua kujikija lutetuku. Udi uusonga, uwandamuna, uwenza mpala wa muntu,

¹⁴nansha uwenza tshimfuanyi tshia nyama. Kulabaye mukubu mukunze ku lupingu, kujikaye kalema kuonsu kadiku.

¹⁵Pashishe udi kulongoluela muaba muimpe, kupopela ku tshimana ne misumadi.

¹⁶Udi kutabalela bua kaluponyi, bualu udi mumanye ne lupingu elu kaluena mua kuimana nkayalu, mbimpe muntu alulame.

¹⁷Kadi padiye musue kutendelela bua bintu biende: dibaka diende, bana bende, ne mbua madimi ende, kena ne bundu bua kulomba kudi tshintu atshi katshiyi ne muoyi to. Udi ulomba bukole bua mubidi,

¹⁸kudi tshintu atshi katshiyi bukole bua mubidi. Kudi tshintu atshi tshifue, udi ulomba muoyi! Udi ulomba diambuluisha kudi lupingu, palu kaluyi nadi, ulomba luendu luimpe, lolu palu katshia kaluena luenda.

¹⁹Ludi ne bianza bidi kabiyi ne bukole bua kukuata, yeye udi ulomba diambuluisha bua bungenda a mushinga buende, bua mpetu yende ne bua mudimu wende, lolu palu kaluyi nadi.