Read Tshiluba Meji 15 Bible Online

Meji 15 - Tshiluba bible

Meji 15

¹Kadi wewe, Mvidi Mukulu wetu, udi mulenga, muena dinanga, muena lutulu. Udi uludika bintu bionsu ne luse.[82]

²Nansha tuetu benze bibi, tudi anu bebe, bualu tudi bamanye bumfumu buebe. Kadi tudi bamanye ne: udi mujadike mutudi bebe. Katuena basue kuenza bibi kumpala kuebe.

³Bualu kukumanya, ke ntuadijilu wa kulonda njila wa buakane. Kumanya bukole buebe, kudi kutufikisha ku muoyi wa kashidi.

⁴Katuvua bapambuke njila, bualu katuvua batendelela mpingu, bintu bienza kudi bantu, bintu bia patupu bifita mukubu kudi bazodi ba meji, nansha lupingu lulaba meekala mashilangane.[83]

⁵Amu bantu batshimbakane ke badi bapambuke pa kumona buimpe bua tshintu, balakana tshimfuanyi tshifue, katshiyi ne muoyi.

⁶Bantu badi benza mpingu eyi, nansha badi bakema bua buimpe buayi, nansha badi bayikukuila, badi banangi ba bubi. Nanku bivua bimpe bua dituku dikuabu, bamone ne tshivuabu batekemena ntshintu tshia tshianana.

⁷Mufumbi wa ngesu udi wenza mudimu ne diima, wenza ngesu itudi nayi mudimu ku dituku ku dituku. Ne diima udi wenza mushindu wa momumue ngesu ya kukuata nayi midimu milenga ne mibi. Mufumbi ke udi ujadika tshidi mua kuenza ne luesu luonsu.[84]

⁸Ne diima dia momumue udi wenza kabidi lupingu ludi kaluyi ne mudimu. Diima dia momumue edi udi wenza nadi lupingu lua dishima! Kena uvuluka ne mbamuenze pende ne diima dia momumue. Kabidi neapingane mu buloba muvuaye mufume, bualu nebamulombe mueyelu uvuabu bamusombesha.[85]

⁹Kena usumpakana bua kuvuluka ne matuku anyi adi makese, nkadi pa kufua. Udi ufuila tshialu ne nsenda udi ufula mpawungi ne tshiamu tshitoke tshia mushinga mukole, widikija benguludi ba tshiamu tshikunze. Udi utekemena kupeta lumu, pende muikale widikija amu midimu ya banga bantu.

¹⁰Muoyi wende mmuenza ne butu. Tshidi tshimuindila tshidi amu lupuishi. Muoyi wende mmushadile ku diima.

¹¹Bualu kena mumanye udi mumufuke, udi mumuenze yeye muine, udi mumuele mupuya mu mimpepe, umuendesha ne mueyelu wa muoyi.[86]

¹²Udi utangila matuku etu a panu bu a kunaya nawu, nansha bu tshisalu tshidi mua kuendulukilabua kupeta biuma bia bungi. Udi wamba mudiye musue kupeta lupetu mu mishindu yonsu, nansha yoyi mibi!

¹³Muntu ewu udi mumanye bimpe mudiye wenza bubi. Diima dia momumue udi wenza nadi ngesu ya dibumba ne mpingu ya nwidie.

¹⁴Kadi, baluishi bebe wewe Maweja-Nangila, bavua bakengeshe bantu bebe,[87] mbantu batshimbakane ku buonsu. Badi bamueneka bashadile ku lungenyi too ne kudi bana batekete.

¹⁵Bualu bavua batendelela mpingu ya matunga onsu. Mpingu ayi ivua ne mesu kayiyi imona, ne matshi kayiyi yumvua. Ivua ne diulu, kayiyi yeyela, yoyi ne bianza kayiyi ikuata bintu, ne makasa kayiyi mua kuenda.[88]

¹⁶Mpingu eyi mmisonga kudi muntu udibu basombesha pende muoyi. Kadi muntu kena nansha mua kusonga lupingu lufuanangane nende bimpe menemene to.

¹⁷Muntu udi ufua, bianza biende udi wenza nabi mudimu wa bubi. Yeye udi mfumu mupite bintu bidiye unemeka. Muntu udi ulala panu matuku makumbane. Kadi tshidiye ukukuila katshienaku, kabidi nansha kale katshivuaku to.

¹⁸Bantu aba badi bakukuila ne nyama idi ikuatshisha muenga, ne idi kayiyi ne lungenyi nansha lukese.

¹⁹Nyama eyi kayena nansha mimpe to. Bulenga buayi kabuena buimpe ku mesu bu bua nyama mikuabu. Mvidi Mukulu muine uvua uyilengulula pavuaye muanyishe bifukibue biende bikuabu, mubiele lupemba.