Read Tshiluba Meji 16 Bible Online

Meji 16 - Tshiluba bible

Meji 16

¹Bantu bavua bakukuila nyama, bayua babakengesha kudi nyama mikuabu, ke muvuabu bajinga. Bavua babakengesha kudi misumba ya nyama.[89]

²Kadi wewe Maweja-Nangila, kuena munyoke tshisamba tshiebe nenku to, bualu tshidi amu tshikutokela ku muoyi. Pasuabu ne nzala uvua mubape nyunyi ya tulumbu.[90]

³Pamuena baluishi bebe nyama ikuatshisha muenga, iuvua mubatumine,[91] bakapanga kumona nzala, kabayi nansha mua kulenga biakudia. Kadi tshisamba tshiebe kufua nzala amu matuku makese, ke kupetatshi tshiakudia tshia pa buatshi, kabidi tshimpe tshitambe.

⁴Nzala kukengesha baluishi bebe bikole bipite. Bionsu ebi mbua kuleja bena diebe, bua bumvue numvua mukengeshe baluishi babu bikole bitambe ne nzala.

⁵Bushuwa, bantu bebe bavua bakengesha kabidi kudi nyama ya lonji, ba bungi kufua ku lulengu lua nyoka. Kadi tshiji tshiebe katshiena tshilunguluke bua kubutula bantu bebe bonsu.[92]

⁶Kadi uvua ubakuatshisha bowa katupa kipi, amu bua kubabela ne kubavuluija meyi ebe. Pashishe wewe kubapa tshimanyinu tshia lupandu, bua bavuluke meyi ne mikandu biebe.

⁷Muntu yonsu uvua witaba meyi aa uvua upanda. Ki mmupanda ne bualu uvua utangila nyoka nansha. Kadi wewe ke uvua umupandisha.

⁸Nenku uvua muleje baluishi betu muudi wewe nkayebe upandisha bantu ku njiwu yonsu.

⁹Baluishi bavua bafue basuma kudi mpasu ne njiji, kakuyi mushindu wa kubapandisha. Bushuwa, dinyoka edi divua, dibakumbanyine bua nyama ibakengeshe.[93]

¹⁰Nyoka ya lulengu mine kayivua mienzele bantu bebe bibi, bualu wewe uvua ubambuluisha ne muoyi wa luse, ubapandisha.

¹¹Nyoka ivua ibasuma bua bamone mua kuvuluka meyi ebe. Kadi kupandabu lukasa bua bamone mua kukuvuluka kashidi, bashala kuelangana meji ku bilenga biudi mubenzele.

¹²Ki mmitshi nansha mafuta bivua bibapandisha to. Kadi Muaku webe, Maweja-Nangila ke uvua ubapandisha, bu mudiwu mua kupandisha bionsu.[94]

¹³Wewe ke mfumu wa muoyi ne lufu. Udi wela muntu mu kandondu ka bafue nansha umupatulamu.[95]

¹⁴Muntu bua lukinu luende udi mua kushipa muinende, kadi kena mua kumupingaja ku ba muoyi. Muntu mumane kuya mu kandondu, muntu nende kena mua kumupatulamu nansha.

¹⁵Muntu nansha umue kena mua kukunyema.

¹⁶Uvua munyoke bikole bantu ba bisamba bikuabu bavua kabayi basue kukumanya. Mvula wa tshipupu ne mabue kubatuuta, mabue a mvula, tshipepela tshikole ne kapia kubashidisha.[96]

¹⁷Bualu bua dikema mbuebu: munkatshi mua mayi a mvula atu ajima bionsu, kapia kavua amu kalakuka. Bintu bionsu bia panu bivua biluila amu bakane.

¹⁸Ndimi ya kapia kuanji kutuya tshitupa, bua kayoshedimu nyama[97] ivua mitumina baluishi. Ke numvua uleja baluishi bebe ne kuena ubalekela, udi amu ubalondakaja.

¹⁹Mu tshikondu tshikuabu, ndimi ya kapia ivua ilunduka munda mua mayi bikole bipite bua kubutula bikunyibua bivua pa madimi a bantu babi.

²⁰Kadi bantu bebe uvua mubape tshiakudia tshia batumibue bua kabapungidi. Wewe kubatumina diampa difumina mu diulu, dimane kulongolola,[98] dia mupuya ne muenyi muimpe, divua dilengelela muntu yonsu. Nansha bantu bajinga mampa a mishindu mishilangane, kadi mane avua asankisha bantu bonsu.

²¹Tshidibua etshi tshivua tshileja bulenga buebe munkatshi mua bana bebe. Tshivua tshisankisha muntu yonsu, kabidi tshivua pa ndiilu wa muntu yonsu.

²²Tshidibua etshi tshivua tshifuanangana ne neje, nansha bu mabue a mayi,[99] kadi kapia kakavua katshiosha, kabidi katshivua tshienguluka to. Ke muvua bantu bebe mua kumanya mudi kapia kabutula bidibua bia baluishi pavua mvula wa tshipupu ne mabue bituuta bantu.

²³Kapia aka kakavua ne bukole buaku, bua bantu bebe bakane bamone mua kupeta tshiakudia tshiabu.

²⁴Bintu bionsu bidi ku bumfumu buebe, wewe Mufuki. Makole abi mbua kunyoka bantu babi. Kadi bidi bileja buimpe buabi ne luse kudi bantu badi batekemena kuudi.

²⁵Bifukibua biebe bivua biambuluisha bana bebe mishindu ne mishindu mu makenga abu onsu. Nenku bivua bikuenzela mudimu bua umone mua kusankisha bana bebe.[100]

²⁶Maweja-Nangila, bana bebe baudi munange bamanye ne: Bidi bibadisha ki mbidibu banowa pa madimi. Bidi bibadisha ke Muaku webe udi ulama ne muoyi bonsu badi batekemena kuudi.[101]

²⁷Tshidibua tshivua kapia kakayi kuosha, tshivua tshienguluka ku nkenke ya diba mikese.[102]

²⁸Ke numvua mutuleja mutudi mua kudianza kujuuka bua kukuela tuasakidila, kabidi kuntendelela diba kadiyi dianji kupatuka.

²⁹Kadi tshidi muena kadiwu utekemena, netshienguluke bu mudi mabue a mvula. Netshipueke bu mayi adi kaayi ne mudimu.